Camping atan inbuatsaih zel

Thla thar February 9 atanga Serchhip District pum huap ‘Ruihhlo ngaite pual Chhandamna Camping’ neih tur atan inbuatsaihna kalpui zel niin he Camping neihna atana mi tlawmngai te sum leh pai thawhkhawm chu cheng nuai 7 chuang a ni tling tawh.
Nasha Mukt Bharat Abhiyan (Drug Free India) hmalakna kal mek bawhzui nan hian Serchhip District-ah Ruihhlo ngaite pualin Chhan-damna Camping hi neih tura ruahman niin he Camping hi thla thar February 9 atang khian neih tura ruahman a ni a, Camping hi chhawng khat chauh neih tura ruahman niin mi 300/400 vel luh theihna tura ruahman a ni. He Camping hi New Serchhip Presbyterian Kohhran Biak In-ah neih tura ruahman niin February 20, 2026 thleng neih a ni anga, Ruihhlo ngai te tan chauh ni tura rua-hman a ni bawk.

He Camping neih turah hian Speaker atan Frederick Lalrindika (Bethel Ministry) chu beisei niin February ni 21 leh 22-ah te mipui a duh apiang chhim theih turin Follow up Prog-ramme hman zui tur a ni dawn a, Serchhip District chhung khawi khua atang pawhin zu leh ruihhlo ngai, a mamawhtu apiang he Camping-ah hian luh theih a ni dawn a. Kohhran belh bik nei loin Organising Committee-ah hian Serchhip Town chhunga Kohhran hrang hrang 16-a hruaitute, sawrkar hnathawk te leh tlawmngai pawl zawng zawng aiawhte an tel a ni.

Ruihhlo ngaite puala Chhandamna Camping neih tur atan hian Organising Committee din niin hemi hnuaiah hian Sub-Committee hrang hrang din a ni tawh a, a tira ruahmanna ah chuan Camping neihna atan hian cheng nuai 10 dawn ngai tura chhut niin hemi atan hian tanpuina sum thawh theihna tur ruahman a ni a. Nimin tlai thleng khan pawl leh mimal, Kohhran, sawrkar Pisa, VC leh mi hrang hrang 152 ten Rs. 7,68,346/- an thawh tawh a, sum thawh duh tan Ph. No. 7628937102 ah Gpay kaltlang-a thawh theih niin sumfai-a pe duh tan DC Office-ah pek theih a ni bawk.