Aizawl-ah Border Fencing duh lohna punkhawm buatsaih a ni

India leh Myanmar ramri hung duhlohna lantirin nimin khan Aizawl-a Vanapa Hall kawt-ah ‘Border Fencing duh lohna punkhawm’ buatsaih a ni.
Mizo Zirlai Pawl (MZP) General Hqrs. leh Zo Reunification Organisation (ZoRO) General Hqrs. buatsaiha he punkhawm ah hian ZoRO President R. Sangkawia chuan Mizoram State sawrkar-in February 28, 2024 khan Border Fencing duh lohna Official Resolution a siam thu leh hei hi Vawiin thlenga thiah a la ni lo tih sawiin, kengkawh zel turin sawrkar an ngen thu leh an thlawp tlat dawn thu a sawi a. Ramri hung chu Zofate then hrang theitu leh inunauna tichhia a, chimrala awm theihna nia sawiin, “United Nation Declaration on the Rights of Indigenous People’s (UNDRIP) pawhin hnam khat unau zalen taka in kalpawh a remtih laia hetia thendarh tuma hmalakna hi pawm harsa kan ti a ni,” a ti bawk.

He hunah hian MZP President Dr. C. Lalremruata pawhin India sawrkarin an ram buaina avanga Myanmar atanga rawn lutte chhuanlama Mizoram ram tha lai zawng zawngah ramri hung a tum chu an hrethiam thei lo tih sawiin, “Ramri hi mihring siam chawp mai a ni a, Pathian in Zofate ram leh hnam min din sak a, Zofate ram rorelna pakhat hnuaia awm kan duh mek laia, Zofate chenna ram insi reng, thendarh a daidanna bang siam a ni tur hi kan pawm thei lo a ni,” tiin India sawrkar pawhin an duhna hriain an hmalakna thulh nghal tura an ngen thu a sawi a. Border Fencing chu a tawp thlengin an do dawn tih a sawi bawk.

MZP leh ZORO hian nimin tlai khan India Prime Minister Narendra Modi hnenah Border Fencing ngaihtuah nawn tura ngenna lehkha chu Mizoram Governor kaltlangin an thehlut a. A copy hi Union Home Minister a pe bawk a ni.