Press Enclosure/Gallery siam loh pawi tih thu sawi

Mizoram Journalist Association (MJA) chuan Aizawl-a Republic Day lawmna a  'Press Enclosure/Gallery' siam a ni lo chu pawi an tih thu an sawi.

    Nimin-a thuchhuah an siamah MJA General Hqrs. chuan India ram ni pawimawh Republic Day leh Independence Day-ah sawrkar thuneitute'n Press mite pawimawhna hriain, duhsak takin kum tam tak chhung chu Press mite tan thutna bik 'Press Enclosure/Gallery' an siamsak thin thu leh an lawm thu sawiin, “Hetihlai hian, kumin 2026-ah erawh chuan Lammual, Aizawl-a Republic Day lawmnaah 'Press Enclosure/Gallery' siam a ni lo tih Aizawl DC Office-a Officer-te hnen atangin hriat a ni a, a hmunah finfiah a ni bawk. Republic Day ngai pawimawha Press mi kalte'n thutna remchang tha kan nei ta lo a ni. Republic Day lawm dan tur rêlnaah MJA aiawh kan tel a, kan duh dan leh kum hmasa lama harsatna kan lo tawhte chiang taka sawi chhuah a ni chunga Press Enclosure/Gallery siam a ni lo hi a pawi kan ti hle,” an ti a. MJA chuan hetiang hi thil awm dan a nih avangin Republic Day lawmnaa tel tuma Lammual-a kal Press mite chu an haw leh tih tarlang bawkin, tun hnuah chuan hetiang thil hi thleng tawh lo se an duh thu an sawi bawk a ni.