Sialhawk khuaa Lakhuihthei tharchhuah te MIFCO in lei sak vek turin ruahmanna an siam

Mizoram Food & Allied Industries Corporation Ltd. (MIFCO) Chairman Lalthazuala Rawite chuan Sialhawk khuaa Lakhuihthei thar te MIFCO in lei sak vek tura ruahmanna an siam thu a sawi.

MIFCO Chairman Lalthazuala Rawite hian nimin khan Sialhawk khuaa Lakhuihthei chingtute kawmin an harsatna tawh leh hmalakpui dan turte a sawipui bakah Lakhuihthei chinna hmun hrang hrangte a tlawh nghal bawk a, Sialhawk khua leh a chhehvel a Lakhuihthei chingtuten harsatna an tawh thin, a hralhna kawngah sawrkarin kumin hian nasa zawkin an buaipui dawn tih a sawi a, “Chief Minister Pu Lalduhoma pawhin min tuipui a, Lakhuihthei an thar te Mizoram Food & Allied Industries Corporation Ltd. (MIFCO) chuan leisak vek tumin ruahmanna kan siam a. Chutihlaiin MIFCO hnuaia thawktu kan tlem em avang leh harsatna dang avangin kan theih anga tam la turin kan inbuatsaih ta zawk a ni,” a ti a, “Lakhuihthei hi kg.1 cheng 18 atanga 20 vela lei turin kan in ruahman a, Sialhawk leh a chhehvela Lakhuihthei chingtute harsatna sutkian kan tum a ni,” a ti.

MIFCO Chairman chuan kum 2024-a MIFCO Chairman hna a zawm tirh khan leiba an ngah thu leh theihtawp chhuaha kawng hrang hranga hma an lak hnuah kum 2025 October-ah chuan an leiba rul zovin hlawkna (profit) cheng nuai 14 an nei hman tih a sawi a. MIFCO chuan Lakhuihthei bakah Sapthei leh mipui ei tur sa thianghlim chenin an buaipui mek bakah Chini leh buhfai thlengin an buaipui tawh tih a sawi bawk.

Sialhawk Pineapple Grower Society Chairman J. Rampanmawia chuan kum 2025-ah Sialhawk-in Lakhuihthei quintal 12,000 an thar thu leh Mizoram puma Lakhuihthei tharchhuah 64% zet Sialhawk khua in an thar nia an inchhut thu a sawi a, “Kan Lakhuihthei tharchhuah te hi a hmunah Rs.10/kg in sumdawngten an rawn lei thin a, Aizawl Bazar, Champhai leh hmun dangah te kan hralhchhuak ber a. State pawn leh India ram pawn thleng pawhin min rawn dawr ve fo thin naa a kalkawng a thuiin a senso a tam a, kan hlawkpui lo a ni. Sawrkar kal tawhten a hralhna kawngah hma min lakpui ve tawh bawk mahse System fel tak hnuaia thiltih a nih loh avangin harsatna kan tawk reng a, chuti chung chuan kan innghahna ber chu MIFCO a ni reng a ni,” a ti bawk.