Serchhip-ah District Bawrhsap hovin Republic Day vawi 77-na lawm a

India Republic Day vawi 77-na chu nimin khan rampum ah urhsun taka lawm a ni a, Serchhip-ah pawh Sports Complex-ah Republitc Day lawmna hi District Bawrhsap Paul L. Khuma hova neih niin Bawrhsap chuan Hnam Puanzar pawtparhin mipuite hnenah thuchah a sawi bawk a ni.

Serchhip-a India Republic Day lawmna ah hian Bawrhsap Paul L. Khuma chuan kum 1950 January ni 26-ah khan India Danpui (Constitution) chu hman tan a nih thu sawiin, “He ni champhaphak a lo thlen hian India ram dung leh vanga cheng ten kan Danpui laimu- dikna, zalenna, intluktlanna leh inunauna a tharin i vawng nung zel ang u,” a ti a. India Danpui duangchhuaktu mi ropui kal hmasate leh kan ram zalenna sualtu pasaltha huaisente zahna chibai bukin, “Keini pawhin an hniak hnung zuiin, kan ram tan kan theihna leh thiamna te i hlan zel ang u,” a ti bawk.

Bawrhsap chuan Serchhip District chhunga sawrkar hmalakna hrang hrang tarlangin, Serchhip Town Beautification Project duan a nih thu leh Mizoram sawrkar UD&PA Department buatsaih inelnaa lawmman kan dawn cheng nuai 50-a bul tanin Department hrang hrangte leh VC-te nen thawk hoin cheng nuai 153.58 sen ral a nih thu leh he sum hmang hian Serchhip khawpui chhung hmun hrang hrang cheithat leh cheimawi hna thawh a nih thu a sawi a. State Collaboration Initiative kaltlangin Serchhip District chuan Sawrkar Laipui DARPG-ah cheng nuai 60 senna tur District Plan and Project Monitoring System Project proposal thehlutin, India ram pum atanga proposal lut zingah Serchhip District chu Mizoram atanga thlanchhuah awmchhun niin tunah hian kalpui tan mek a nih thu a sawi bawk.

Mizoram-a a hmasa ber ni tura District mipuiten harsatna awlsam taka thuneitute hnena an thlen theihna tur ‘Vantlang Viltu App’ siam a nih thu pawh Bawrhsap chuan sawiin, “Mi 429 an in register tawh a. Kum kalta chhunga complaint 53 kan dawn zingah 51 chinfel a ni tawh a, 2 hi buaipui mek a ni,” a ti a. August ni 8, 2025-a Tourism Department buatsaih ‘Narrating Mizoram: Tales of Our Land’ Storytelling Competition-ah Serchhip District chuan lawmman pakhatna kan dawn thu pawh Bawrhsap chuan a sawi bawk.

Sawrkar hmalakna dangte pawh tarlangin, Power sem darhna tihchangtlun zel niin Thenzawl - Zote South ah km 12-a thui 11kV Line siam zawh a nih thu leh New Serchhip leh Thenzawl-ah 100kVA Distribution Transformer dah belh a nih thu te; Digital Crop Survey kalpui mekah Landmark App hmangin kuthnathawktute ram 1018 chhinchhiah an nih tawh thu te; ASF hri leng vanga Vawk thi zangnadawmna atan Vawk pakhat zelah Rs. 4000 pekchhuah niin chhungkaw 1261 ten an dawn thu a sawi bawk.

Serchhip District-ah MGNREGS hnuaiah kumin chhungin ni 86 inhlawhna siam tawh niin mipui inhlawhna atan cheng nuai 12.14 sen a nih tawh thu leh MGNREGA chu a kalphung tidanglam hretin kum khata ni 125 inhlawh theih tawh turin VBG-RAM-G (Viksit Bharat - Guarantee for Rozgar and Ajeevika Mission Gramin) tih a nih tawh dawn thu pawh Bawrhsap chuan a sawi a, Serchhip District Civil Supplies Office chuan ei leh bar tlachham lova Furpui kan paltlang theih nan Monsoon Stock Kudam 6-ah dahkhawl thu pawh a sawi bawk.

Mipui sawrkar chakna thahrui chu sawrkar chakna ah chauh a innghat lo tih District Bawrhsap Paul L. Khuma chuan sawi bawkin, “Tui mal far te te, tiauvut hrang awmkhawm, tuipui lian a lo thlenin, ram nuam a lo awm” tih kan zir thin ang khan, keini he ram khua leh tuite hi kan pawimawh tih hria ila. Keini leh kan fate, thangthar lo la awm leh zel turte hnenah ram tana inpekna leh ram hmangaihna thinlung i tuh zel ang u,” tiin Serchhip District mipuite chu thawhpui-ah a sawm bawk.