Serchhip District-ah thubuai ziahluh tlahniamin thubuai ziahluh zingah rukruk kaihhnawih a tam fal

Kum kalta 2025 chhung khan Serchhip District Police te chuan thubuai 129 ziaklutin heng zinga thubuai 113 te chu Chargesheet thehluh hman a ni a, rukruk leh inrawk thubuai chu a tam fal hle a. Kum hmasa (2024) nena khaikhinin nikum chhung khan thubuai ziahluh hi nasa takin a tlahniam a ni.
Serchhip SP Office atanga LENKAWL in thu a dawn danin kum kalta (2025) chhung khan Serchhip District chhunga Police Station hrang hrangah thubuai 129 ziahluh a ni a, heng zinga 105 te chu BNS hnuaia ziahluh niin thubuai dang 24 te chu Local & Special Law hnuaia ziahluh a ni a, heng thubuai ziahluh 129 zinga 113 te hi Chargesheet peihfel-a thehluh ni tawhin thubuai ziahluh atanga chhutin za zela 87.59 te chu Chargesheet thehluh a ni tawh a, thubuai 72 te chu Court-ah relfel ni tawhin thubuai ngaihtuah lai 41 a la awm a, Pending Investigation leh Final Report siam 8 ve ve a awm bawk a ni. Kum hmasa (2024) nena khaikhinin nikum (2025)-ah hian thubuai ziahluh nasa takin a tlahniam a, kum 2024 khan Serchhip District-ah thubuai ziahluh 191 awmin kum hmasa aiin nikum khan thubuai ziahluh hi 62 zetin a tlem zawk a ni.

Nikum chhunga Serchhip District-a BNS hnuaia thubuai ziahluh 129 zingah hian rukruk leh inrawk (Burglary leh Theft) kaihhnawih ah thubuai 77 zet ziahluh a ni a, hei hi thubuai ziahluh zawng zawng atanga chhutin za zela 59.68 zet a tling a ni. Heng bakah hian thubuai ziahluh tam leh chu Mischief hnuaiah leh nunna chan-a lirthei chetsualna thleng niin thubuai 4 ve ve ziahluh a ni a, heng bak hi thubuai ziahluh tam lutuk awm lovin Tang tlanchhuak leh tualthah tumna thubuai pakhat ve ve ziahluh a awm bawk a ni.

Heng bakah hian Local & Special Law hnuaiah thubuai 24 ziahluh a awm bawk a, heng zinga a tam ber te chu Zu leh a kaihhnawih thubuai MLP Act hnuaia ziahluh niin thubuai 10 ziahluh a ni a, hursualna laka naupangte venhimna dan, POCSO Act hnuaiah thubuai 8 ziahluh awm bawkin ND&PS Act hnuaiah ruihhlo leh a kaihhnawih thubuai 5 ziahluh a awm bawk a, Arms Act hnuaiah thubuai pakhat ziahluh a awm bawk a ni. Local & Special Law hnuaia thubuai ziahluh 24 zinga 21 te hi Chargesheet thehluh ni tawhin thubuai 5 te ngaihtuah zawh a ni tawh a, thubuai 16 ngaihtuah mek niin Pending Investigation 2 leh Final Report siam pakhat a awm a ni.

Serchhip District chhungah hian Police Station pathum- Serchhip, Thenzawl leh North Vanlaiphai-ah te awmin East Lungdar-ah Beat Post leh Chhingchhip-ah Out-Post a awm a, nikum December thla khan Serchhip Bazar-ah Police Beat Post thar chu Serchhip SP chuan a hawng thar leh bawk a ni.