Vibrant Village Programme-II zirhona neih a ni

India sawrkarin ramri (International Land Borders)-a awm khua te thuamchakna tur atana hma a lakna, Vibrant Village Programme zirchianna leh sawihona chu nimin khan Aizawl-a Planning & Programme Implementation Department Conference Hall-ah neih a ni.

Rural Development & Administration Department hmalaknaa ramri-a cheng, thingtlang khuate tih hmasawnna tur chungchang zirchianna leh sawihona, ‘Workshop on Vibrant Village Programme -II’ hi RD&AD Minister Prof. Lalnilawma chuan hmanpuiin VVP-II chu Mizoram tan a pawimawh thu a sawi a, ram himna leh hmasawnna thlentu pawimawh tak a nih tur thu a sawi. Mizoram-ah kum 1993 chho atang tawhin Border Area Development Programme tih hmangin ramri-a khuate tih hmasawnna turin hmalakna kalpui a lo nih tawh thu sawiin, tun thlenga hmasawnna kan hmuhte erawhin duh thu a la sam tawk lo hle tih a sawi a; VVP-II hnuaiah hian Mizorama RD Block 16 atangin thingtlang khaw 109-te chu Ministry of Home Affairs-in Vibrant Village Programme kalpuina atan a thlan thu sawiin, Northeast State zingah pawh khaw thlanchhuah tam berna pawl kan ni tih a sawi bawk.

Vibrant Village Programme hi India sawrkarin ramri (International Land Borders)-a awm khuate thuamchakna tur atana a hmalakna pawimawh tak niin kum 2023 khan ‘VVP-I’ tiin kalpui tan a ni a, VVP- I chuan India leh China ramri-a awm khuate a huam a; VVP-II erawh chuan India leh Myanmar leh India leh Bangladesh ramri-a awm khuate huam thungin, State 15 leh UT 2-ah te kalpui tur a ni dawn a, kum 2024-2025 atanga kum 2028-2029 chhung atana thawh tura ruahman niin hemi atan hian cheng vbc. 6839 ruahman a ni a, 100% Central Funding a ni tawh dawn bawk a ni. Mizoram-ah chuan District 8 huam chhunga RD Block 16 hnuaia thingtlang khaw 109 te thlan a ni.

He programme hnuaiah hian 4 Thematic Areas -  a Fur a Thal a lirtheih tlan theihna (all-weather road connectivity) te, inbiakpawhna (telecommunication) te, Television leh Electric connection (on-grid connectivity) te chu ngaihpawimawh hmasak tur niin heng bakah hian 10 Intervention Areas – Livelihood Generation; Road Connectivity; Villager Infrastructure & Health facilities; Energization; Television & Telecom Connectivity; Promotion of Tourism, Culture & Outreach activities; Financial Inclusion; Empowerment of Youth & Skill Development; Cooperative development, SHGs, FPOs leh Educational Infrastructure te a awm bawk a, BADP nen a danglamna chu 100% sum Central-in a tum tur a nih tawh bakah  Inrfrastracture chauh ni tawh lovin mipuite eizawnna leh hriselna te, India ram laili zawka awmte nena inkungkaihnattha zawk an neih theihna turte ngaih pawimawh lehzual a ni tawh dawn a ni.