N. Vanlaiphai mi thihna a mawhphurtu nia hriat man

North Vanlaiphai Damdawi Veng-a cheng Richard Lalhmingliana (27) s/o  R. Lalawmpuia chu niminpiah khan Aizawl-ah boralin mi kutthlak vanga boral ni ngeia hriat a ni a, he thihna chungchang ah hian FIR thehlutin pawikhawihtu nia hriat chu Police ten an man tawh.
Richard Lalhmingliana leh a thiante hi kar kalta khan Aizawl-ah chhukin Salem Veng-a Road Side Home Stay-ah an thleng a, Pathianni zan khan lengchhuakin heta an haw lam chu ITI Veng-ah vanduaina a tawk ta nia hriat a ni a, Social Media hrang hranga CCTV footage thehdarh atanga a lan danin Richard Lalhmingliana hi Pathianni, January 25, 2026 zan (Thawhtanni zing) dar 1:30 vel khan kawngpui-a a kal lai chu tlawhthluk niin nikhaw hre lovin a awm zui a, damdawi In panpui ni mah se Thawhtanni chhun dar 11:30 vel khan a boral a, a ruang hi an khua (North Vanlaiphai)-ah lak niin Postmortem a nih hnuah nimin khan vuiliam a ni.

He thihna thleng chungchang ah hian Police hnenah FIR thehluh niin pawikhawihtu nia hriat H. Lalruatmawia (19), Chanmari West Aizawl nia insawi chu nimin khan Police ten an man nghal a, North Vanlaiphai Welfare Aizawl chuan kutthlaktu nia rinhlelh rang taka Police ten an man nghal chu lawmawm an tih thu thuchhuah siama tarlangin, “Video footage a kutthlaktu chet dan han en hian pawisak nei lo, nunrawng taka chetna niin kan ngai a, hetiang mi hi mi dangte tan pawha mi hlauhawm niin a lang,” an ti a, a phu tawk hremna a hmuh ngei an phut thu an sawi bawk.

North Vanlaiphai Joint VC leh All NGO te pawhin nimin khan thuchhuah siamin he thihna thleng chungchangah hian North Vanlaiphai mipuite thinlung a nain a rum tak meuh meuh tih an sawi a, “He pawi sawi lo thihna avang hian N. Vanlaiphai mipuite chuan pawi khawihtu hi danin a phut ang tak leh a phu tawk hremna a hmuh ngei theih nan eng kawng pawh zawh ngai se, kan zawh zel ang a, hma kan la z>l d^wn a ni,” an ti bawk.