Chief Minister-in NCC Mizoram Group Headquarters a hawng

Chief Minister Lalduhoma chuan nimin khan National Cadet Corps (NCC), Mizoram Group Headquarters chu hawngin, Assam State atanga awp thin NCC Mizoram chuan ama pualin Group Headquarters a nei tawh dawn a ni.

Chief Minister Lalduhoma chuan Mizoram in NCC Group Headquarters a neih theih nana hma a lo lak tawh dan sawiin, “Kan thalaite hian NCC hi phur takin zawm se, nun kaihhruaina tha hmuh nan hmang se kan duh a, ruihhlo-in kan thalai tam tak a tibuai a, heng thil tha lo lakah hian thalaite kan ven a tul kan ti hle,” a ti a. Hei bakah hian thalai fel leh vengva tak tak kan neihten an theihna leh thiamnate zau zawkin phochhuak thei se an duh thu leh chung te ngaihtuah chung chuan Group Headquarters hi nei ve ila an duh thu te a sawi a ni.

Maj. Gen. Anurag Vij, ADG (NER) chuan thalaite chu mahni inthunun thei, mi tumruh, ram, khawtlang leh chhungkaw tana mi tangkai ni tur te, ruihhlo leh nundan thalo laka fihlim turte in a tul ang zelin an zirtirin an kaihruai tih sawiin, “State sawrkarin chutiang lam hawi hmalak tul a tihna apiangah hma kan la thei a ni,” a ti a. India hmarchhak thalaite chu an felin an fingvar a, nimahse India ram hmundangah an inkiltawih deuh thin nia a hriat thu a sawi bawk.

He hunah hian NCC Mizoram Group Headquarters awmna hmunhma tur sawihoin State sawrkarin an awmna tur ram a pek theih chuan an hmunhma chu an in sak theih thu an sawi a. Ram pawh hi neih hlen tura inpek a ngai lova, luah hawh mai tur a nih thu an sawi a. Tunah hian Mizoram-ah NCC Unit pali, Cadets 8000 vel an awm mek a ni.