Department te thawhhona tha a pawimawh thu sawi

Horticulture Minister C. Lalsawivunga chuan Department-te inkarah thawhona tha a awm loh chuan hmasawnna a thuanawp thin tih a sawi.

Mizoram Horticulture Service Association Annual (MHSA) Conference Vawi 28-na nimin a State Guest House, Aizawl-a neih a hmanpuina ah Horticulture Minister chuan Sawrkar hnuaia Department hrang hrangte chuan thawhhona tha (Convergence) an neih a pawimawh  tih sawiin, a bik takin Horticulture, Agriculture leh AH& Vety Department-te chu Department inngheng tawn leh tangkawp tlat an nih thu a sawi a, Department hrang angin ding mah se thu inhmu leh in lungrual taka hna an thawhho phawt chuan Loneitu leh Ranvulhtute'n an hlawkpui takzet tih a sawi a. Chutihrualin, Department-te inkarah thawhona tha a awm loh chuan hmasawnna a thuanawp thin thu sawiin, “A tuar bertu chu Loneitu leh Ran-vulhtute an ni a. Chuvang chuan thawhhona tha, Convergence Policy chu a pawimawh tak zet a ni,” a ti bawk.

Mizoram-in ei leh bara intodelhna kawnga ke a penna ah an thiamna leh theihna hmang zel turin Horticulture Minister chuan he huna tel te chu a fuih a. Tunlai thiamna leh hmanrua te chu zirchianga hmang tangkai zel tura chahin, Kuthnathawktute kiangah che tama, Field Work-a hnathawhte a tam thei ang ber hmu turin MHSA Member kalkhawmte chu a chah bawk.

Adviser to Chief Minister (Hand Holding Scheme) Dr. K.C. Lalmalsawmzauva chuan he hun hi khual zahawm nia hmanpui bawkin Mizoram chu thlai tharna hmun 'Horticulture ram' a nih thu leh chumi chu Sawrkar pawhin hriain thlai thar chhuah kawnga Loneitute hamthat nan Flagship Programme atan Handholding Scheme chu a ruahman thu a sawi a. Hei hi Mizo thlai neih te tihlar nan leh a hralhchhuah dan tur duan fel sa (Market Oriented) a tih a nih thu a sawi a. Horticulture Department chu thlai chi tha leh Seeding Variety tha tak tak Mizoramin a neih theih nana thawktu Department pawimawh tak an nih thu sawiin, Loneitute'n thlai chi tha ‘Export Quality’ an neih reng theih nan theihtawp chhuah turin a fuih bakah thlai thar sawngbawl leh dahthat (Processing) hna pawh tun aia chak zawk a ngaihtuah zel turin a chah a. Thlai thar leh ranvulh kawngah Mizoram in hma a sawn zel theih nan hmalakna chak taka kalpui a nih thu sawiin, Hand Holding Progress Partner-te zingah in mamawh tawn leh thawkho thei zawnchhuah leh thawhho tir a pawimawh thu a sawi bawk.

Mizoram Horticulture Service Association (MHSA) Annual Conference-ah hian chawhma lamah Report ngaihthlak niin Member thar mi 13 te lawmluh an ni a, 'Mizo sawhthing hlawk zawka chin dan leh tharchhuah sa enkawl dan tha' tih chu zirho  a ni bawk.