ZPM kaihhruai sawrkar hmalakna a nih thu sawi

Zoram People Movement (ZPM) Thalaite chuan Universal Health Care Scheme thuamchakna tura Sawrkar-in ADB loan a lak tur US Dollar maktaduai 108 chu ZPM kaihhruai Sawrkar hmalakna liau liau a ni tih an sawi.

Inrinni-a Aizawl Press Club-a thuthar thehdarhtute an kawmna ah ZPM Thalai President, Jeje Lalpekhlua MLA chuan Sawrkar hmasa MNF kaihhruai hunlai khan Healthcare Scheme atan Asian Development Bank kaltlanga sum puk turin hmalak a lo ni tawh a, hei hi tuna Mizoram Universal Health Care Scheme thuamchakna atana nikum December thlaa ADB-in US Dollar maktaduai 108 a pawm nen a inang lo tih sawiin, Sawrkar hmasain Mizoram Health Care Scheme atana ADB loan an buaipui chu kum 2022 June ni 14-ah Screening Committee of Department of Economics Affairs-in approval a pe a, he approval hi Loan lakna tura Approval a la ni lova, hemi hnu hian Fact Finding Mission nei turin Asian Development Bank hotute Mizoram-ah an lo kal a, Loan Approval pek hmain Independent Verification Agency (IVA) tifel hmasa turin Mizoram Sawrkar chu an hriattir a, loan lakna tura MNF kaihhruai Sawrkar laia Proposal siamsa chu Grant Fund tura tih a ni a, amaherawhchu, Universal Health Coverage atan Grant pek theihna hi Central Govt. Policy-ah a awm lo a, hei vang hian Proposal chu ennawn turin Department of Economics Affairs chuan ADB leh Mizoram Sawrkar chu November ni 22, 2024 khan a hriattir a ni, a ti a. Hetiang a nih tak avang hian ZPM kaihhruai sawrkar chuan tih tur tul angte tiin hma thar a la a, ADB puihnain Proposal siam ngaite a thara siam lehin, a hming atan Supporting Health Care System Strengthening to Achieve Universal Health Coverage for Mizoram tih an vuah a, thil tul hrang hrang buaipui a nih hnuah nikum December khan US Dollar maktuaduai 108 chu pawm a ni ta niin a sawi.

ZPM Thalaite chuan April ni 1, 2025 atanga January ni 16, 2026 thleng khan MUHCS hnuaiah damlo 68,022 enkawl an nih thu leh an senso cheng vbc. 115.25 pawh sawrkarin a pe tla tawh tih an sawi a. Grace Period September ni 16, 2025 thlenga MUHCS-a inziaklut chu chhungkua 20,198 an awm thu leh an zinga 17705 (87.65%) chu General Ward hnuaiah an ni tih a sawi a. Semi Private Ward hnuaiah chhungkua 1602 (7.93%) leh Private Ward hnuaiah 891 (4.41%) an awm a. MUHSC-ah hian sawrkar hnathawk leh an chhung te, sawrkar hnathawk pensioners, sawrkar hnathawk pension chhung te leh ABPM-JAY (golden card nei) te thunluh sa an nih thu a sawi bawk.

Mizoram chhunga chhiat tawkte ruang 1680 chu ZPM sawrkarin a phurh sak tawh tih sawi bawkin ZPMThalai President chuan, ruang phurhna atan hian Rs. 175,85,602 hman a nih tawh thu leh he scheme hi an sawrkar chhung chuan kalpui chhunzawm zel an tum thu a sawi bawk.