Zirna In sang dah turin phut

Champhai Joint NGOs - Sub-Hqrs.YMA, MHIP, MUP leh MZP Hqrs. chuan Champhai a zirna sang zawk dah turin sawrkar nawr an tum tih an sawi.

Inrinni-a thuthar thehdarhtute an kawmna ah MZP Hqrs. Champhai President H. Lalruatdika chuan Mizoram hmun dangte ngaih-tuahin Champhai District chu zirna lamah a la hnufum nia an hriat thu sawiin, MZU/Mizoram State University Eastern Campus din tura sawrkar hotute an lo nawr tawhah beiseina an neih san loh thu leh University Eastern Campus dah a nih loh pawhin Govt. Champhai College-ah Stream 4- Arts, Commerce, BCA leh Science zirna awm mek bakah he College-ah hian Post Graduate zirna tal sawrkarin dah tura an beisei thu leh a tul ang zela an nawr dawn thu a sawi a. 

Champhai-ah State University Eastern Campus dahin Pro-Vice Chancellor in thutchilh se an duh thu Champhai Joint NGO te chuan an sawi a. Hei hi nakin zela NEP hmalakna kalpui nan a tangkai dawn thu sawiin, Mizoram State University hi Lunglei-ah a awm dawn a nih chuan Lunglei kal kher lova Basic Level Paper Work tal pawh Champhai-ah a tih ve theih dawn thu an sawi a. School pahnih khat tal Champhai-ah dah ve ni se an duh thu sawin, hei hi University hmasawn nan leh Mizoram zirna insemrual nan a pawimawh thu an sawi a ni. 

Champhai Joint NGO te chuan Champhai chu India sawrkar Policy, Act East Policy atan hmun tangkai tak a nih avangin tih hmasawn a pawimawh hle nia an hriat thu an sawi a. Cham-phai-ah emaw khawchhak lamah emaw hian National emaw State level zirna in engmah dah a ni ve lo tih sawiin, Lunglei chu population ah pawh an ni aia an tam viau hran tawh loh thu an sawi a. Lunglei-a Mizoram State Uuniversity awm theih nan an MLA te ban hial huama an tang na ngam angin an MLA te pawh an tan nat ngam ve ngei an beiseiin an phut tih an sawi bawk.