MNF party in IAF hnena Lengpui ram hralh chungchang CBI chhuitir an phut thu an sawi

MNF Party chuan Indian Airforce (IAF) hnena Lengpui ram hralh a nih dan chu CBI chhui tir an phut tih an puang a, ZPM sawrkarin CBI chhuitir an ngam ngei tura an ngaih thu leh an chhuitir lo a nih chuan mantang eitu zingah an tel ngei tihna a nih tur thu an sawi.

Inrinni khan Aizawl Press Club-ah MNF Treasurer leh MNF Publicity Board Chairman ni bawk Lalruatkima chuan thuthar thehdarhtute kawmin, Indian Airforce hnena Lengpui ram hralh anih danah tlan paha chhiar theih khawpa langsar, nasa taka dan bawhchhiatna a thleng niin a sawi a. “Ram lak/hralh a nih tur thu sawrkarin dan ang taka hriattirna, Preliminary Notification a tihchhuah atanga ni 70 chhung lekin ram neitu dik tak pawh ni lo, a buaipuitute kutah cheng vbc. 188 zet pekchhuah vek hman a ni a, ram lak kalpui dan (acquisition process) chak ber record a nih a rinawm,” a ti.

Lalruatkima chuan, Lengpui-a ram neitu mi 8 te hmingin ram leina man, compensation/award hi siam a nih laiin, heng ram 8 (pariat) te leikhawmtu nia insawi Rohmingliana hnenah Aizawl DC Office chuan 25.07. 2025 leh 26.08.2025-ah te a belhkhawmin cheng vbc. 70 a pe chhuak niin a sawi bawk a, a bak zawng Rs. 1,17,90,26,341 (vbc. 117.90) zet chu ram neitu ni ve miah lo, a buaipuitu nia sawi, Henry Lalremsanga Hlawnmual hnenah 25.07.2025 khan pek vek a ni a. Award/ Compensation siamna hming tumtu, ram neitu dik tak mi 8 te chuan cheng khat mah an chang ve lo thung niin a sawi bawk.

Hmanhmawh tak leh hnawhsarum taka hmalak a nih dan en in sawrkar thuneitu sang atanga nawrna a na hle tih a chiang tih MNF Treasurer chuan sawiin, “CM leh sawrkar thuneitute hi thuk takin an inrawlh ngei niin a lang,” a ti a. “Airforce ram tur leinaah hian dik lo taka hlawkna teltu, mantang eitu zawng zawngte chhui chhuak vek a, dan anga hremna lekkawh anih ngeina turin CBI chhuitir kan phut tlat a ni,” a ti a. Social Impact Assessment kal kan phalna Exemption dilna pawmpui (Approved) tu chu Revenue Minister B. Lalchhanzova a nih thu sawiin, “Hmanhmawh taka thil kalpui a nih avangin RFCTLARR Act, 2013 hnuaia ram lak anih dawna tih hmasak ngei ngei ngai 'Social Impact Assessment (SIA)' pawh kal kan (exempt) a ni. SIA kal kan phalna hi Land Revenue minister B. Lalchhanzova chuan 15.5.2025-ah khan a pawmpui (approved) chuk chuk a ni,” a ti a. “SIA kalkan phalna Revenue Minister in a pawmpui ni veka Preliminary Notification tih chhuah nghal rum rum a nih bakah, Preliminary Notification hi Danin a phut anga puanzar a ni lo a, a ram neitu Lengpui khawtlang hruaitute hriattir an ni lo a, chanchinbu-ah chhuah a ni bawk lo a, sawisel duh neite tana ni 60 chhung hun hawn thin pawh ni 15 lekah pawhtawi a ni,” tiin “Sawrkar ram lakna dan hnuaiah ram leitu chu sawrkar a nih zel avangin Lengpui ram hralhtu pawh hi ZPM sawrkar ngei a ni,” a ti bawk.