Furniture Workshop ten harsatna an thlen sawiho

Serchhip District chhung Baktawng leh Chhuanthar khuaa Furniture Workshop ten a chhehvela cheng mipuite hriselna atana harsatna an siam thu report thehluh chungchangah nimin khan Bawrhsap hovin inrawnkhawmna neih a ni.
He inrawnkhawmna Serchhip DC Meeting Hall-a neih ah hian Serchhip SP, Gavit Gogna leh mi pawimawh dangte telin Bawrhsap Paul L. Khuma chuan Baktawng leh Chhuanthar-a Furniture Workshop neitute kutthemthiamna chu fakin, hma sawn zel tur leh tunlai khawl thar ber ber te nena inzir chho zel turin a fuih a. Serchhip-a Sr. CMO, Dr. LP. Malsawma chuan air pollution avanga mihring hriselna chhiat theih dan te sawiin, Health worker te pawhin Chhuanthar naupang ten hritlang awmna an vei rei bik tih an report thu a sawi a. Furniture workshop atanga boruak thalo in a thlen a ni thei em tih chu finfiahna awm rih lo mah se, thil awm thei a nih thu a sawi.

He thutkhawm ah hian Baktawng leh Chhuanthar-a Furniture Workshop neitute koh tel niin an eizawnnain mipuite hriselna a nghawng thei tih chu an inpawm thu leh theih ang anga inkaihhruaina pawh an siam thin thu an sawi a. He harsatna tawh mek chinfelna tur hian uluk taka inrawnkhawmna an neih hnuah Industrial Vacuum Cleaner chu Society anga hman ni se; Chhuanthar MPACS lam hian pathum (3) an dawn tawh chu hmang tan nghal se an ti a. Baktawng chu Industrial Area-a puan a nih vat theih nan thuneitute hma la tura ngen an ni a, Industrial Area-a puan chin huamchhungah mihring chen khap tlat nise an ti bawk.

He harsatna chinfel a nih theih nan leh mipui hriselna atana him tur inzirtirna kawngah chak taka hma la turin Baktawng leh Chhuanthar VC te leh Society hruaitute chu ngen an ni a. District Administration chuan tih tur leh tihloh turte kimchang taka ziakin Prohibitory Order a tichhuak dawn bawk a ni.