Mizoram-ah National Voters’ Day 2026 hman a ni

National Voters’ Day 2026 chu Mizoram hmun hrang hrangah hman niin Aizawl ah pawh Inrinni khan SP Conference Hall-ah ‘My India, My Vote’ tih thupui-a hmangin he ni hi hman a ni.

Voter naupang zawkte ram hruaitu thlannaa nasa zawka tel tura chawhphur nan sawrkar laipui chuan January ni 25, 2011 khan Election Commission of India din ni (January ni 25, 1950) champhaphak ah National Voters’ Day hi a hmang tan a. Kumin hi a vawi 16-na niin Aizawl-a he hun hmanna ah hian Electoral Registration Officer (ERO) te, Assistant ERO te, Booth Level Officer (BLO) te bakah voter tharte leh sawm bik NGO, Kohhran, political party-te leh thuthar lakhawmtute an tel a ni. He hunah hian Mizoram Chief Electoral Officer (CEO) Dr. Lalrozama chuan Voter tharte chu an vote dik taka hmang ngei turin a fuih a. Democracy leh election reng reng chu mipui avanga hlawhtling a ni tih sawiin, India democracy chuan mi chi hrang hrang inang lo tak tak a huam avangin ram hruaitu thlanna atana inrelbawlna (electoral machinery) tha neih a pawimawh a, election chu thianghlim, felfai, langtlang, mipui rinkai leh huap zo (inclusive) a ni tur a ni tih a sawi a. Hemi atan hian Electoral Roll dik leh thianghlim a ngaih thu leh BLO-te pawhin mapping an kalpui mek a, 87% vel zawh tawh a ni tih a sawi bawk.

He hunah hian Best Election District Award semchhuah a ni a, Champhai District in ‘Effective Use of Technology in Elections’ dawngin Aizawl chuan ‘Election Management and Logistics’ leh ‘Training and Capacity Building’ dawngin Mamit District in ‘Innovative Voter Awareness Initiatives’ leh ‘Model Code of Conduct Implementation and Enforcement’ an dawng bawk a. He inelna atan hian DEO Office hrang hrang atanga nomination lut chu Chief Electoral Officer Chairman-na hnuaia endik niin, he’ng District tithate hi thlanchhuah an ni.