Nikum chhungin Mizoram tlawhtu an pung nasa

Nikum chhung khan Mizoram tlawhtu zinmi an pung nasa a, mi 8,41,000 chuang an tling a ni.

Tourism Department chhinchhiah danin nikum (2025) January atanga December chhunga Mizoram tlawhtu mi 8,29,839 te chu ramchhung mi niin midang 11,484 te chu ramdang mi (foreigner) an ni a. Ramchhung mi Mizoram rawn tlawhtu hi kum 2024 nena khaikhinin za zela 97 velin an pung a, rampawn mi tlawhtu hi za zela 112 in an pung thung a ni. Nikum September thla a Bairabi leh Sairang inkar Rel kawng a rawn hawn hnu khan Mizoram tlawhtu hi an pung zual hle a, kum 2024 September thla khan Mizoram tlawhtu 30,507 an nih laiin nikum September thla kha chuan mi 95,885 an tling a. Nikum bikah December thla kha Mizoram tlawhtu tam ber thla a ni a, mi 1,33,520 in an tlawh a ni.

Ramdang mi Mizoram tlawhtu tam ber chu Myanmar atanga lo lut an ni a, Ramdang mi Mizoram tlawhtute ang ni lovin Lawngtlai District-a sumdawng a lo lut an ni ber a, nikum June thla atang khan an pung zual nia chhinchhiah a ni bawk.