MIFCO in man man zawkin Sapthei lei sak tum

Chawngtlai khua in Sapthei an tharchhuah te chu MIFCO in man man zawkin an lei sak dawn.

Nimin khan Mizoram Food & Allied Industries Corporation Ltd. (MIFCO) Chairman Lalthazuala Rawite chuan Chawngtlai khua tlawhin Sapthei chingtute leh khawtlang hruaitute a kawm a, an khawtlang mipui eizawnna pui ber Sapthei hralhna kawngah buaina an neih lohna turin MIFCO chuan theihtawp a chhuah dawn tih sawiin, “Chawngtlai khua hi Mizorama Sapthei ching nasa ber khua an ni a, Sapthei thar a nih hunah a thar vanglaia harsatna an tawh lohna turin MIFCO chuan rate tha tak hmanga leisak turin ruahmanna kan kalpui mek a, MIFCO-in a leina tur zat tunah bituk nghal thei lo mah ila kut hnathawktuten man man taka an hralh theih nan hma kan la dawn a ni,” a ti.

Sapthei Association Chawngtlai hian kum kalta 2025 khan Sapthei quintal 1,500 vel an tharchhuak a, kumin hian tam zawk thar an inbeisei a, Chawngtlai khuaah hian chhungkua 404 awmin Sapthei chingtu chhungkua 247 an awm mek a ni.