Bana Kaih Phase-II Loan Component-ah Progress Partnet atana dilna lut 386 pawm tawh

Mizoram sawrkarin hmasawnna leh intodelh tum te puihna atana a duan, Bána Kaih (Handholding) Scheme thawh hnihna (Phase-II) hnuaiah Loan Component Progress Partner atana dilna 386 pawm a ni tawh a; Phase-I hnuaia Progress Partner atana thlan mi 349 hnenah Bank-ten loan an pe tawh.
Bána Kaih Scheme hnuaia Loan dilna lut hi a kaihhnawih sawrkar Department (Implementing Department)-te'n an endik hnuah Implementing Department-te'n recommend list an thehluh atangin a felfai leh pek tlâk chu Handholding Scheme-a thuneitu sang ber, Apex Body in ngaihtuahin a pawmpui thin a; Apex Body-in a pawmte hi Bank-te hnenah an pawmpui tura thehluh leh thin niin, Bank-te hian dilna an pawmte hnenah Loan an pechhuak thin a ni.

Mizoram State Policy Coordination Committee (MSPCC) hotute sawi danin, Bána Kaih Scheme thawh 2-na kalpui mekah hian Loan Component hnuaia Progress Partner ni tura dilna lut zinga 386 pawm a ni tawh a; Phase-II Loan Component-ah hian Bana Kaih hnuaia sawrkarin a thawhpui Bank-ten mi 7 hnenah Loan an pe tawh a ni. Loan pek tura dilna pawm tawh te hi Commerce & Industries Department hnuaiah tam berin mi 219 an ni a; AH&Vety Department hnuaia dilna pawm tawh 81-in a dawt a. Mizoram KVI Board hnuaiah 35, Cooperation Department-ah 20, Land Resources Soil & Water Conservation Department-ah 10, Agriculture & Farmers Welfare Department-ah 6, Fisheries Department-ah 5, Horticulture Department-ah 3, UD&PA leh Tourism Department-ah 2 ve ve, Sports & Youth Services Department, Information & Communication Technology Department leh Science & Technology-ah dilna pakhat theuh pawm a ni tawh bawk.

Handholding Scheme Phase-I hnuaia Loan Component-ah khan Bana Kaih hnuaia sawrkarin a thawhpui Bank 3-ten mi 349 hnenah loan an pe tawh a; Mizoram Rural Bank-in Loan pe tam tawh berin mi 232 hnenah an pe tawh a, State Bank of India-in mi 78 leh Mizoram Cooperative Apex Bank-in mi 39 hnenah an pe tawh bawk a ni.

Mizoram State Policy Coordination Committee-in a tihchhuah 'Progres Partner-te Puitu' tih lehkhabua tarlan danin, Progress Partner-in Loan a lakna atana project a siam chu cheng nuai 50 aia tam lo a nih a, bahlah loa thla tin a rulh bawk chuan Mizoram sawrkarin an bana kaih nan an loan pung (interest) zawng zawng chu kum chanve (thla 6) danah an mimal Bank account pangngaiah a rul lêt thin dawn a; hemi tur hian Progress Partner-te chuan loan an lak chu Bank kalphung angin a pung zawng zawng nen an rulh phawt a ngai thung a ni. 

Bana Kaih Phase-I hnuaia loan cheng nuai 50 la tlinglo zingah Bank-ten loan an pek atanga thla 6 liam tawh engemawzat an awm a, heng mite zinga loan rul thate hnenah hian sawrkar chuan an loan rul atanga pung an pek tel chu rul let turin buaipui ngaite a buaipui mek niin Mizoram State Policy Coordination Committee hotute chuan an sawi a ni.