Tourism chungchanga mipui inzirtirna, inzirna leh inrawnkhawmna uar zawka kalpui tum a ni

Tourism Minister Lalnghinglova Hmar chuan kumin chhungin Tourism chungchanga mipui inzirtirna, inzirna leh inrawnkhawmna uar zawka kalpui a nih tur thu a sawi.

Mizoram Tourism Service Association (MTSA) chuan nimin khan Chaltlang Tourist Lodge-ah General Conference neiin infuihtharna hun an hmang a, he hunah hian Tourism Minister Lalnghinglova Hmar chuan Tourism Department kalpui an tum dan sawiin, thawktute pawh inbuatsaih lawk turin a chah a. “Mizoram-ah khualzin an pung hi a lawmawm takzet a, mipui nawlpui pawh an lawm a, hei hian kan economy pawh a tha zawngin a nghawng ngei ang. Hetihlai hian tourist-te hian thil tha chauh ni lo, thil tha lo pawh an luhpui châng a awm a, heng thilte lo dawngsawng thiam tur leh Tourist nena chenho kan thiam hi a pawimawh a, inzirna uar zawka kalpui a ngai a ni,” a ti a. Kohhran, tlawmngai pawl hrang hrang, zirna In leh pawl hrang hrang nen a tam thei anga inhmuh-khawma inkawm a tul thu sawiin, “Tourism hi mitin khawih a nih avangin Department-in mal beih chi a ni lo a, tanrualna tur a ni,” a ti bawk.

Kum khat chhunga khualzin hip thei tur Calendar an siam chu a tangkai tur thu leh khualzin in zin chhan an neih zel theihna turin 'Event' tam zawk buatsaih an tum tih Tourism Minister chuan sawiin, “Mizoram mawina hi tun hma atangin a la pangngai reng. Mi in an tlawh a, an lo zin duhna turin tourist hip tur Event buatsaih a tul,” tiin, “Hemi kawngah hian thenawm State-te hnungah kan tlan mek a, zawi zawiin hma kan sawn chho zel ang,” a ti a. Tunhnaia khawtlang nen tangruala tourism (community based tourism) kalpuiah hlawhtlinna an hmu chu lawmawm a tih thu sawiin, a hlawkna chu a khaw neituten tel zel turin ruahmanna an siam zel dawn tih a sawi a. Winter Festival lian zawk leh huam zau zawk buatsaih an tum tur thu a sawi lang bawk.

MTSA Infuihtharna hun hi Tourism Director R. Lalrodingi chuan kaihruaiin Mizoram sawrkar hnuaia Tourism Department Staff te an kal tha hle a ni.