Gas bur mamawh loh hun a nghahhlelhawm

Gas bur mamawh loh hun a nghahhlelhawm

- Malsawmdawngzela Hrahsel

January 14, 2026 khan Gas bur mamawh tawh lo a, chenna In a Gas kan herh haw mai theihna tura hmalak mekna zirchiangin, Food Civil Supply & Consumer Affairs (FCSCA) Minister B. Lalchhanzova Team kan zui a, a inchhirawm loh hle.

FCSCA Minister hi FCSCA Secretary Teresy Vanlalhruaii, FCSCA Addl. Secretary Andrew H. Vanlaldika leh FCSCA Director Saizikpuii ten an tawiawm a ni. Tripura Natural Gas Corporation Limited hotute nen inkawmhona an neih hnuin Tripura-a Natural Gas hmangtu Industry lian PRAN Beverages (India) Pvt. Ltd., Tripura Industrial Growth Centre, CNG Station leh ONGC hmunpuite a tlawh kual a; eirawngbawl nana Natural Gas hmangtu Pipeline connection 330 awmna Subham Solitaire pawh tlawh a ni.

Industry lian tak takte hian Natural Gas chu an hman tangkai takzet thu FCSCA Minister leh a Team-te hi an lo hrilh a ni. Mizoram-ah hman theih a nih ve hun chuan chhungkaw tam tak bakah Industry tam takin an chhawr tangkai viauin ka ring a, Industry din thar tumte tan hlei hlei a tangkai ang. Tuna Gas bur kan hman mek ngaihtuahin a senso a sang lo. A chak thain, bunfel tawh chuan a awlsam hle.

FCSCA Minister leh a team-te hian hnathawktu Indradhanush Gas Grid Limited (IGCL) leh Tripura Natural Gas Corporation Limited (TNGCL) te chu zawhna an zawt chikin, Mizoram tlangram a nih avanga harsatna awm thei turte, a him tawk leh tawk loh turte leh thil dang engemaw zat an zawt a, anni lamin an lo hrilhfiah zel a, rawtna leh duhdan an neihte pawh an thlen. FCSCA Minister leh a team-te hian an zir uluk hle bawk a ni.

IGCL leh TNGCL-te hian an lo dawngsawng tha hle a. An rin aiin kan FCSCA Minister leh a Team-te hi an taima in, zawhna an ngah ngeiin ka ring. Kan FCSCA Minister leh a Team-te hian an zirchianna te hi an sawiho leh ngei anga, chu chuan Mizoram tan rah tha a chhuah ngei ang. Zinna senso lah TNGCL lam tum a lo ni nen. Mizoram sawrkar sum tlang ti hek loin, Zoram tan hlawk takin an feh chhuak ngei dawn niin a lang.

Mizoram tan a tangkai dawn em avangin FCSCA Minister leh a Team-te hian hnathawktute hi hmanhmawh taka hnathawk turin an nawr nasa hle a, Mizoram lama harsatna an neih chuan theihtawpa tanpui an inhuam thu an hrilh. Minister Team-te inpekna leh thahnemngaihna hian hnathawktu lam pawh hi a tilawm takzetin ka hria a, rah tha a chhuah ngei ka beisei. A hlawhtlin hun chuan Mizoram tan mellung pawimawh a ni dawn.

A tir lama ziah awm tak, thlen zanah Agartala-a Mizo chhungkua Natural Gas hmang tangkaitu pawh tlawh an ni a, anni chuan an fak takzet. Ren miah loa an hman pawhin thla khatah Rs. 1,000 vel bak an chawi ngai loh thu FCSCA Minister hi an lo hrilh. Gas bur ngaihtuah a ngai lo a, awlsam takin an herh chhuak mai thin. Kawng chhia avanga Gas harsatna thleng pumpelhna atan pawh a tangkai dawn hle.

Gas Pipeline hi Panisagar Terminal, Tripura atanga intan niin Sihhmui, Mizoram-ah Receiving Terminal bun a ni dawn. Panisagar leh Sihhmui inkar pipe thui zawng hi kms. 119.5 niin pipe diameter hi feet 1 a ni a, leimin leh shock laka him tur pipe hman niin, pipeline hian Kanhmun, Zawlnuam, Kawrthah, Tuidam, Darlak, Mamit leh Lengte te a paltlang dawn.

Panisagar–Sihhmui inkara pipe phum hna hi IGCL-ten thawkin, Sihhmui Terminal atanga Aizawl khawpui chhunga Gas sem darh leh enkawl zui hna chu TTNGCL-ten an chang ve thung dawn a ni. Aizawl khawpui bakah hian Mizoram hmun hrang hrangah a tahtawla la sem darh zel tura ruahman a ni. Tripura–Mizoram Gas Pipeline Project hi North East Natural Gas Pipeline Grid hnuaia mi niin December, 2027 velah thawh zawh hman beisei a ni a, tun dinhmunah 45% vel thawh zawh tawh a nih thu IGCL hotute chuan an sawi a ni.

TTNGCL-te hian IGCL-te hnathawh zawhah hna tan chauh an tum. Hei hi FCSCA Minister chuan tha ti loin, a theih ang anga lo inhma-khua turin TTNGCL hotute a hrilh. TTNGCL lam pawhin Receiving Terminal bunfel a nih hmain pawhin theih ang anga bul an lo tan dawn thu FCSCA Minister hnenah hian an sawi a, hna pawh tan vat an tum.