Sanghal thi ten ASF hri an kai tih finfiah a ni tawh

Tunhnaia Serchhip District chhung Thentlang khuaa Sanghal thi te chu ASF hri an kai ngei tih finfiah a ni tawh.
Nikum (2025) December thla vel atang khan Thentlang khaw chhehvel ramah Sanghal thi engemaw zat hmuh a ni a, heng te hi Vawk hri leng, African Swine Fever (ASF) hri vanga thi nia rinhlelh a nih avangin Chhingchhip atangin AH & Vety Department-a thawktute chu Veterinary Officer Dr. Zothanpuii hova kalin Serchhip atangin MVU Team te chu Dr. Timothy Lalmalsawma hovin an kal bawk a, heng Sanghal thi zinga thenkhat te Sample chu enfiah turin an la a, heng Sample lak te hi PCR hmanga enfiah a nih hnuah ASF hri an kai ngei tih kar kalta Zirtawpni khan finfiah a ni.

Tunhnai chho-a Thentlang leh a chhehvel a Sanghal thi hmuh hi a vaiin 15 vel zet a ni tawh nia thudawn a ni a, thenkhat chu a ruang tharlam tak tak hmuh a nih laiin thenkhat erawh chu a ruang lo chhe tawh te a ni hlawm a, Sanghal ruang hmuh lo te pawh awm tura ngaih niin Sanghal ruang an hmuhna thenkhat hi chu khua atanga hla lutuk lo te a ni bawk a ni thudawn a ni. Sanghal thi te hian ASF hri an kai tih fin-fiah ni mah se Thentlang khuaa Vawk vulhtute chuan ASF avangin harsatna an la tawk rih lo nia thudawn a ni bawk.