Mizoram Bana Kaih Venture Capital Fund leh Startup Readiness Level of Mizoram tlangzarh a ni

National Startup Day Mizoram Edition lawmna chu nimin khan Aijal Club-ah neih niin he hunah hian Chief Minister Lalduhoma chuan Mizoram-a a hmasa ber ni turin Mizoram-a sumdawnna kalpui mek leh kalpui tumte tan Mizoram Bana Kaih Venture Capital Fund leh Startup Readiness Level of Mizoram a tlangzarh.

Planning & Programme Implementation hnuaia Mizoram Startup Mission leh Department for Promotion of Industry and Internal Trade (DPIIT) bultuma ‘National Startup Day Mizoram Edition’ lawmna hunah hian Chief Minister Lalduhoma chuan kum tam tak chhung chu Mizoram-ah thiamthil leh ngaihtuahna tha tak tak nena sumdawnna bei an lo awm tawh thin thu sawiin, nimahsela, thlawpna leh puihna an hmuh that loh avangin an sumdawnna a than theih loh bakah an suangtuahna a tak ramah a chang thei lo thin tih a sawi a. “Entrepreneur-ten bultanna tur an mamawh ang pawisa an nei lova, kawng kawhhmuhtu tha an nei lova; sumdawnna lian leh hlawhtling din turin kawng zawh tur mumal an hre lo thin. He Bana Kaih Venture Capital Fund hian chutianga harsatna an tawh thin chu a rawn sukiang dawn a ni,” a ti.

Chief Minister chuan Bana Kaih Venture Capital Fund chu sumthlawnpek leh thawhlawm a ni lo tih sawiin, “Rinna leh inrintawnna nena sum peipunna a ni. Entreprenuer hma hun êng tak nei leh thang zel tura theihna nei, eizawnna bultantute a pui dawn a, a bik takin heng - sumdawnna kalphung tha, thang thei tur leh danglam (innovative business model) ngaihtuah chhuak thei te, kut themthiamna lam hawi leh industry dina thilsiam chhuak (products) duh te leh tunlai thiamnaa (technology) innghata eizawnna siam duh te a tinzawn ang,” a ti a. “Pawisa hian sumdawnna a thantir thei a, inrintawkna hian hma lam pan turin a pui thung a. Chumi kawngah chuan kan tlangzarh tak Start Up Readiness Level of Mizoram hi a pawimawh ve thung a. Record vawnna a ni mai lova, Mizoram-a entreprenuer-te leh eizawnna kawng danga hmalakna tur tarlangtu pawimawh a ni. Miten theihtawp an lo chhuah dan te, an tih tak takna te a hmuh theih dawn bawk a ni,” a ti bawk.

Startup Readiness Level of Mizoram chungchang pawh sawiin Chief Minister Lalduhoma chuan, “SRL hmang hian, Entreprenuer chuan Official Recognition a hmu thei dawn a, eizawnna bul tantìr te leh eizawnna tênau zawk beite chu Investor, Bank leh Firm liante tan hmuh zung zung theih an ni anga. Policy duangtute chuan Data tharlam ber ber hmangin Scheme tha leh rintlak zawk an duang thei ang a, Firm lian tak takte chuan thil hrang hrang titute thil tih, an tihna hmun leh thlen chin chiang takin an hre thei bawk ang. Mizoram chhunga sumdawnna hrang hrangte hi langtlang, rintlak leh puih tlakin a siam bawk dawn a ni,” a ti bawk.

He hunah hian Mizoram Startup Mission (MSUM)-a CEO Lalrinzuala chuan Bana Kaih Venture Capital chungchang a sawifiah a, Target atan cheng vbc. 100 dah niin sawrkarin Bana Kaih atangin cheng vbc. 20 a pe (tiam) a. A dang chu kawng dang atanga hmuh tum a ni. Pool Fund a nih angin Security Exchane Board of India (SEBI)-ah Trust Registration neih a ngai a, ‘Senhri Investment Fund’ tia register neih a ni. Operating partners tur company tha tak tak thawhpui a ni bawk.

SEBI hnuaia register a nih angin India ram ngaihtuah chunga kalpui a tul a, a tum bul ber erawh chu Mizoram Entrepreneur-ten bul an tan nan emaw, hma an sawn zelna tura hma an lakna tur sum, dan ang thlapa tumpui a ni a. DPIIT hnuaia Registered Startup ten an dil thei a, chutiang Registered Startup chu 42 chauh Mizoram-ah an la awm avangin a dil thei hi neih tam a tul hle nia sawi a ni.

Nimin a hun hman ah hian Startup Readiness Level chanchin chu MZU Incubation Centre atangin Lalremtluangi chuan a sawi bawk.