Myanmar raltlan Biometric Enrolment ti tam tawh

Mizoram-a awm mek Myanmar raltlante mitnaute leh kutze thla endik-a chhinchhiah hna kal mekah za zela 90 thelh thawh zawh a ni tawh.

Home Department hotute sawi danin Krismas leh kumthar vuakvet velah Pisa kai hun a tlem hle chungin Mizoram-a Myanmar raltlante Biometric Enrolment kalpui mek chu chhunzawm zel a ni a. Kar kalta Zirtawpni thleng khan Mizoram-a raltlan awm mek mi 28,964 zinga mi 26,049 te Biometric Enrolment tihfel a ni tawh a, chu chu za zela 89.94 a ni a. Aizawl, Lunglei leh Serchhip District bakah Myanmar raltlan tamna ber Cham-phai District-ah te chuan Myanmar raltlan awm zawng zawngte mitnaute leh kutze thla endik a chhinchhiah vek a ni tawh a. Khawzawl District-ah za zela 94.19 zawhfel ni tawhin, Kolasib District-ah za zela 93.55 leh Mamit District-ah za zela 90.58 zawhfel a ni tawh bawk a. Raltlan tamna ber dawttu Lawngtlai District-ah erawh za zela 61.11 chauh zawhfel a la ni.

Champhai District-ah hian Myanmar atanga rawn raltlan mi 11,715 an awm mek a, Lawngtlai District-in dawtin raltlan mi 6,017 an awm a. Tarlan tawh angin raltlan awm tam dan indawta pathumna Aizawl District-a raltlan mi 4,159 te chu Biometric Enrolment tih zawh vek a ni tawh a ni.

Bangladesh raltlan chhinchhiah hna erawh a kal muang a, tun dinhmunah za zela 13.52 chauh kalpui a la ni a. Hei hi a chhan ber chu an awm tam berna Lawngtlai District-ah bul tan mumal a la ni loh vang a ni. Lawngtlai District-ah hian Bangladesh raltlan hi mi 2,042 an awm a, chu'ng zinga pakhat chauh chu a mitnaute leh kutze thla laksak a la ni a. Bangladesh raltlan 235 awmna Serchhip District, raltlan mi 76 awmna Lunglei District leh raltlan 7 awmna Aizawl District-ah te chuan an mitnaute leh kutze thla lakkhawm hna hi zawhfel vek a ni tawh thung.