Lunglei District-ah Clinical Establishment 59 awm

Lunglei District-ah hriselna dinhmun enfiahna leh inentirna (Clinical Establishment 59 awm mekin a tam zawk chu mimal ta leh enkawl a ni.

Hriselna dinhmun enfiahna leh inentirna, Clinical Establishment (CE)-te dan anga chhinchhiah leh khuahkhirh tura din, District Registering Authority (DRA) chu nimin khan Lunglei-ah thukhawmin he huna tarlan a nih danin tun dinhmunah Lunglei District-ah hian sawrkar hriatpui Clinical Establishment 59 a awm mek a. Hemi zinga 15 chu sawrkar enkawl (District Hospital, Community Health Centre leh Primary Health Centre) te nii, a dang 44 chu mimal din (Private) damdawi In, Clinic leh Laboratory a ni thung a. Hospital 19, Clinic 21, Dental Clinic 12, Physiotherapy Clinic 2 leh Diagnostic Laboratory & Imaging Centre 5 a awm a ni.

Sawrkar laipui dan siam, The Clinical Establishments (Registration and Regulation) Act, 2010 behchhanin Mizoram-a Clinical Establishment-te chhinchhiah, khuahkhirh leh vil zuina tur, The Mizoram Clinical Establishments (Registration and Regulation) Rules, 2014 chu Mizoram-ah hman a ni a. He dan hnuaiah hian damdawi In, Clinic leh Laboratory te chu DRA-ah an inziahluh (register) vek a, a him chin leh pawm theih chin (minimum standard) an phak ngei ngei a tul a. Chuti ang tur chuan Lunglei District-ah pawh hian hmalak chhoh mek a ni.