Zu chhe in vanga thi mi 56 chhinchhiah an ni tawh

Excise & Narcotics Department chhinchhiah danin kum 1997 atanga nikum (2025) kumtawp thlengin Mizoram-ah Zu chhe in vangin mi 56 an thi tawh.

Kum 1997 a Zu chhe in avanga Mizoram-a thi mi 4 an awm atang khan Excise & Narcotics Department hian Zu chhe in avanga thi hi an chhinchhiah tan a, hemi kum hian mipa pathum leh hmeichhia pakhat thiin Zu chhe in te hi Methylated Spirit (Zu a methyle pawlh) in avanga thi an ni a. Hemi hnu lam hian Zu chhe in chhinchhiah mi 56 awm tawhin an zinga mi 49 hi mipa an ni a, hmeichhia 7 an awm bawk. Mizoram-a Zu chhe in avanga thi tam ber kum chu kum 2001 kha a ni a, hemi kum hian mi 14 an ti a, thi zinga 8 hi Methylated Spirit in an ni a, midang 6 erawh chu an zu in dinhmun tak hriat chian a ni lo thung a. Mizo-ram-a Zu chhe in vanga thi mi 56 zinga a tam ber, mi 36 chu Methylated Spirit a pawlh in vang a ni a. Eng ang zu chhia nge a nih hriatchian loh in vanga thi 12 an awm a, Myanmar sipai zu, BEDC an tih mai in vanga thi 6 an awm a, Pethidine telh in vanga thi 2 an awm bawk.

Zu chhe in avang hian kumtin thi an awm lo a, kum 1997 leh kum 2025 inkar hian thi an awm loh kum a tam zawk a, kum 28 chhung hian kum 17 chu zu chhe in vanga thi an awm lo a. Zu chhe in vanga thi an awm hnuhnun ber pawh kum 2022 kha a ni. Zu in nasat avanga hrisel lohna leh natna-in a tlakbuak avanga thite chu Excise & Narcotics Department hian an chhinchhiah tel lo a ni.