Chief Minister in ‘Mizoram CSR Connect’ a hawng

CSR diltu leh a petute inzawnna tur leh inthlunzawmna tur (CSR Matchmaking) Portal, Mizoram CSR Connect chu nimin khan Chief Minister Lalduhoma chuan hawngin, he portal hian CSR lamah awlsamna tam tak min thlen a beisei thu leh CSR chu langtlang taka kalpui a nih zia hriatna atan he hmalakna hmalakna hi kalpui a nih thu a sawi.

Mizoram CSR Cell, Planning & Programme Implementation leh UNDP India tangkawpin an siam ‘Mizoram CSR Connect ‘ hawnna hun Aijal Club, McCabe Hall-a neih ah hian Chief Minister Lalduhoma chuan ‘Mizoram CSR Connect’ a puitlin theih nana thawktu UNDP India, Planning & Programme Implementation leh CSR Cell te chungah lawmthu sawiin, “Kum 2023-24 CSR Data atanga a lan danin Mizoram chuan India rama CSR hmanchhuah zawng zawng 0.06% chauh a hmu a. CSR hmangin hmasawnna hna lian leh tangkai tak tak a thawh theih avangin kum 2024 June thla khan Chief Minister Office-ah CSR Cell kan din ta a ni,” a ti a. An hmalakna zarah a petute leh a diltute inzawnna Matchmaking Portal - Mizoram CSR Connect chu an lo hawng thei ta tih sawiin, “He Portal hian CSR lamah awlsamna tam tak min thlen kan beisei a, a petute tan pawha langtlang taka CSR kalpui a nihzia hriatna a ni dawn a ni,” a ti.

Mizoram chu State ralmuang, eirukna tlemna, ziak leh chhiar thiam tamna, khuarei daih hmasawnna SDG lama hma la tha, mipuiten tlawmngaihna rilru pu-a engkim an tihna ram a nih avangin Corporate-te tan CSR hmanga luanchhuahna hmun tha a nih thu pawh Chief Minister chuan sawiin, hmalakna tur remchang a tam hle bawk tih a sawi a. CSR nei Company leh an hnuaia Civil Society te chu Mizoram-a an CSR rawn hmang chhuak tura sawmin, “An pawisa rawn senral tinrengte chu langtlang, awmze nei leh hlawk taka hman ni dawn tih kan tiam a ni,” a ti bawk.

UNDP India-a Resident Representative, Angela Lusigi pawhin India leh khawvel huap pawha Portal zahpuiawm lo tak ‘Mizoram CSR Connect’ tlangzarh theih a nih chu lawmawm a tih thu sawiin, a bultumtute zingah UNDP an tel chu an inchhuang tih a sawi a, “UNDP hian India ramah hmalakna tam tak kan nei a, kan ngaihpawimawh chu khuarei daih hmasawnna (Sustainable Development) te, hmeichhiate chawikanna te, nungcha leh ramngaw venhimna lam te an ni a. Mizoram in hmalakna tha tak tak a neih avangin kan lawm a. Mizoram nena thawkho zel turin kan inpeih reng a ni,” a ti. Hmalakna hlawhtling kan neih theih nan data dik a innghat ruahmanna neih a tul thu pawh sawiin, “CSR hmanga hmalakna te pawh a hlawhtlin theih nan data dik behchhana ruahmanna siam leh kalpui a pawimawh zel. Mizoram CSR Connect hian data rintlak hmanga hnathawk turin CSR petu leh a thawktute a tanpui nasa dawn a ni,” a ti bawk.

He hun hman hi Planning & Programme Implementation-a Secretary Lalmalsawma chuan kaihruaiin Mizoram CSR Cell-a Chairman, TBC. Lalvenchhunga chuan Mizoram-a CSR hmanga hmalak theihna langsar zualte a tarlang a, Mizoram Start-Up Mission leh Corporate/Institution pahnih ten an inremna (MoU) lehkha inhlanna an nei bawk.