Mizo thalaite chu theihna sang tak nei, ram hmasawnna tura innghahna an nih thu sawi

Students' Self-Support Union (SSU) Ruby Jubilee lawmna leh General Assembly vawi 39-na chu nimin khan Aizawl Vanapa Hall-ah neih niin he hun hmanpuitu Mizoram Larsap General V.K Singh chuan Mizo thalaite chu theihna sang tak nei, ram hmasawnna tura innghahna an nih thu a sawi.

SSU General Assembly cum Ruby Jubilee lawmna-ah hian Larsap General (Dr) Vijay Kumar Singh chuan zirlai ni chunga mahni intodelh tum tlat Students' Self-Support Union-in kum 40-na hmel a hmu ta chu thinlung taka a lawmpui thu sawiin, an hmalakna chhuanawm tak chu midangte fuih phurtu a ni tih hriaa theihtawp chhuaha chhunzawm zel turin a chah a. Tumruhna leh beih hram hramna tel lo chuan hmalam pan a harsa tih sawiin, SSU hmalakna chu zirlaite cho phurtu pawimawh tak a ni, a ti a. Zirna senso leh inelna sang chho mek zel karah SSU chuan kut hnathawh a zahpui lova, sum leh paia intodelh leh mahni kut kea din a ngaipawimawh a, hei hian zirna hi degree neih nan mai ni lo, mi puitling chherchhuah nana pawimawh a ni tih a entir chiang hle a ni, a ti a. SSU-in zirlai mahni intodelh tuma theihtawp chhuahte chawimawina hun a buatsaih thin chu fakawm a tih thu sawiin, “Mahni kutkawih hmanga intodelhte chu an nghetin an tlo a, inthununna an nei thain engpawh hmachhawn dawn se an ngaihtuah awm lo nge nge thin a ni,” a ti bawk.

SSU hi May ni 27, 1985 khan Aizawl-a Hrangbana College-ah din niin thupui atan 'Zirna atana mahni intodelh' tih leh 'Kuthnathawh chawisan' tih an hmang a. Nimin-a he hun hman ah hian an President Darhmingliana chuan an pawl thupui chu zirna atana mahni intodelh leh kuthnathawh chawisan a nih thu sawiin, intodelh nana tha ber chu sum leh pai renchem taka hman a nih thu a sawi bawk.

He hunah hian Report hrang hrang ngaihthlak a nih bakah kum 40 kalta chhunga pawl hmalak dan video tawi thlirho a ni a, Self Support Award 2025 dawngtu zirlai pathum te chu kalkhawmte hmaah kohchhuaha chawimawi niin, zirlai dangte fuihphur nan an hmalak dan tlangpui a ni a. Kum 2026-2027 atana SSU Gen Hqrs. hruaitu thar te puanchhuah an ni bawk.