Bank-a thawktu ten Inrinni-a chawlh vek an phut

India rama Public Sector Bank Union pawl lian hrang hrang pakua (9) insuihkawm pawl United Forum of Bank Union (UFBU) te chuan nimin khan India ram pumah lungawi loh an lantir a, Mizoram-ah pawh Bank hnathawktu ten kar khata ni 5 hnathawh phutin lungawihlohna lantirin, Mizoram-a Bank-te pawh khar vek a ni. He Bank Strike hi Indian Bank Association (IBA)-in a lo recommend vek tawh, Bank-te Inrinni zawng zawng chawlh a lo nih theih nana sawrkar an nawrna a ni a. Mizoram-ah pawh Bank hrang hranga thawktu ten thlawpin Aiaawl-a State Bank of India (SBI) Aizawl Main Branch, Zodin Square kawt-ah Bank hnathawk engemaw zat pungkhawmin lungawi lohna an lantir a ni. 

Indian Bank Association hian UFBU te nen hian Inrinni zawng zawng chawlh a lo nih theih nan December ni 7, 2023 khan Memorandum of Understanding an lo siam tawh a. Joint note/Settlement pawh March ni 8, 2024 khan an lo nei leh tawh bawk a. Amaherawh, chu sawrkar laipui lam hian he inremna hi hman a nih theih nan thu a la chhuah lo a ni.