Serchhip District chhung khaw hrang hranga tui intur sem dan thlirho a ni

Nimin khan Serchhip-ah District Water & Sanitation Mission (DWSM) thutkhawm neih niin khaw hrang hranga tui intur sem dan thlirho a ni.
Serchhip DC Meeting Hall-a Serchhip District Water & Sanitation Mission (DWSM) thutkhawm hi an Chairman leh Bawrhsap Paul L. Khuma chuan kaihruaiin kalkhawmte chibai bukin thutkhawm koh a nih chhan tlangpui te a tarlang a, hemi hnu hian PHE Serchhip WATSAN Division-a Sr. EE,  Isaac Lalchhuanmawia chuan Jal Seva Aankalan (JSM) kalpui mekah Mizoram chu a titha ber pawl an nih thu sawiin, JSM hnuaiah hian Village Council te chu an khuaa tui lakna dinhmun, a thatna leh fel tawk lo lai awmte enfiah a, eGram Swaraj Portal-ah thun vek tura tih an ni tih a sawi a. Serchhip District (Rural)-ah chuan khaw 23 ten hei hi tifel tawhin Portal lam fel loh avanga tifel thei lo khua 7 an la awm thu tarlan a ni bawk.

He thutkhawm ah hian Serchhip District chhung khaw hrang hranga tui intur sem dan thlirho niin khaw tam zawkah tui hnianghnara pek theih an nih tawh laiin khaw thenkhatah harsatna an tawk tih tarlan a ni a. Heng tui harsatna khuaah te hian Department lamin harsatna an tawh dan te tarlan niin, khuarel chhiatna avanga khawl leh mamawh dang chhia te, tui hna kam avanga a hmun sawn ngaite leh khawl hlui tawh thlak ngai awm te vanga harsatna thleng a nih thu ngaihthlak a ni a, a siam that dan leh tihchangtlun dan turte sawiho a ni bawk a. Jal Arpan Diwas (Tui hnathawh inhlanchhawnna) chu sawrkar laipui beisei angin thla thar February 15, 2026 ralhmaa neih tur a nih thu he hunah hian tarlan ni bawkin, he Programme-ah hian PHE Department in tui pekna an siamte chu dan angin a khaw neitu mipuite hnenah an hlanchhawng dawn a. Mizoram District tinah khaw hnih-ah tal programme hi hman tura tih a nih angin Serchhip District-ah chuan Hriangtlang leh Khawlailung khua ah te hun hman tura ruahman a ni bawk.

Nimin-a thutkhawm ah hian Sewage Treatment Plant siam dan pawh sawiho a ni a, PHE Department te hian Serchhip khawpui chhungah hmun hnih an enchhin tawh thu sawiin, a hmunhma te pawh he hunah hian thlirho a ni a, khawtlang hruaitute bawhzui turin an kutah dah a ni.