Serchhip District-ah TB vei enkawllai mi 44 awmin chawtha eina tur tanpuina pek vek an ni

Kum kalta (2025) chhung khan Serchhip District-ah TB vei mi 52 hmuhchhuah niin tun dinhmunah TB vei enkawllai mi 44 an awm mek.
Nimin khan Serchhip DC Meeting Hall-ah Serchhip District TB Forum leh District Task Force Committee on Immunization chu an thukhawm a, he hunah hian kum kaltaa TB Mukt Bharat Abhiyan Phase-I hnuaia hmalakna thlirho niin nikum chhung khan TB vei leh vei lo enfiah mi 15,394 awmin heng zinga mi 1113 te chu X-Ray hmanga enfiah zui niin mi 1050 te TrueNaat leh CBNAAT hmanga enfiah an ni a, mi 113 te chu Microscopy hmanga enfiah an ni bawk a, heng atang hian TB vei mi 52 hmuhchhuah an awm a, hetihlai hian TB vei zingah enkawl dam awm ve deuh reng bawkin kumin January thlaa TB vei hmuhchhuah thar te nen TB vei enkawllai mi 44 an awm mek a, TB leh HIV vei kawp mi 7 awmin MDR-TB vei mi 2 an awm a, nikum khan TB vanga thi mi pathum an awm bawk a ni. Serchhip District-a TB vei enkawllai te hi Nikshay Mitra hnuaiah chawtha an ei theihna turin tanpuina pek vek an ni a, mi tlawmngai ten hemi atan hian sum leh pai an thawh a ni.

He thutkhawm ah hian kumin (2026) February thla atanga TB Mukt Bharat Abhiyan Phase-II kalpui tur pawh thlirho a ni a, tun tumah hian khaw tina mipui cheng zat atanga za zela 20 te chu TB an vei leh vei loh enfiah tura ruahman a nih thu te, damdawi In-a damlo enkawl te chu TB an vei leh vei loh enfiah vek tura ruahman a nih thu te leh kumin hian TB Free Village a puan theih khaw 23 an awm thu te tarlan a ni a, kumin hian TB Free Village-ah hian Gold dawng thei khaw 1, Silver dawng thei  khaw 7 leh Bronze dawng thei khaw 15 an awm dawn a ni.

Nimin-a thutkhawm ah hian District Immunization Officer Dr. Lallawmkimi Chhakchhuak chuan Human Papillomavirus (HPV) Vaccine chungchang sawifiah bawkin he Vaccine hi Chhul hmawr Cancer kan tih thin venna tur a nih thu a sawi a, Hmeichhia kum 14 tling tawh, kum 15 la tling lo te hnenah vaccine hi pek tur niin Dose khat man chu Rs. 4000/- vel ni mah se a thlawna pek tur a nih thu a sawi a. Mi pakhat tan hian Dose khat zel pek tur a nih thu a sawi bawk.

Thutkhawm kaihruaitu Serchhip Bawrhsap Paul L. Khuma chuan TB dona kawnga hmalakna ah a hlawhtlinna tha tak tak hmuh tur a awm zel chu lawmawm a tih thu a sawi a, kumin ah TB Free Village-a puan theih khaw 23 lai an awm ta chu lawmawm a tih thu pawh sawiin, khaw tam zawk an inpuan theihna tura hmalak a tul thu leh Data dik leh rintlak neih a nih theihna tura hmalak zel a pawimawh thu te a sawi bawk a ni.