Tanpuina dawng turin naupang 150 thlan an ni

Integrated Child Protection Service (ICPS) tia hriat thin, Mission Vatsalya hnuaia Serchhip District Sponsorship and Foster Care Approval Committee chu nimin khan District Bawrhsap Paul L. Khuma hovin a Pisa-ah an thukhawm a, kum 2026-2027 chhunga Serchhip District-a naupang chhawmdawl ngai mi 150 te chungchang ngaihtuah niin chhawmdawlna (sponsorship) pek rem tih a ni a, he ruahmanna hnuaiah hian naupang chhawmdawl ngai te hi thla tin Rs. 4000/- pek thin niin naupang te ei leh in, hriselna leh zirna lama an mamawh-a hman tura tih a ni.

Mission Vatsalya hi sawrkar laipui hmalakna niin naupang venhim ngai leh enkawl ngaite ham-thatna tur peng hrang hrang kalpui a ni a. Chung zingah chuan Sponsorship leh Foster Care hi telin sum leh pai-a naupang chhawmdawl mamawh ngawih ngawih - nu leh pa nei lo, natna khirh vei te leh harsatna khirh tak dang tawktute hnenah chhawmdawlna hi pek thin a ni a. Dilna thahnem tak lut thinin District Sponsorship and Foster Care Approval Committee lo enfiahin, chhawmdawlna dawng awma an ngaih te pek thin an ni a, an sum hmanna te pawh vilzui a ni bawk.