Serchhip Kawlri tlang-a Cultural Heritage Centre sak mek DoNER Secretary-in a hmunah a enfiah

Sawrkar Laipui Ministry of Development of North Eastern Region (DoNER)-a Secretary Chanchal Kumar IAS chuan nimin khan Serchhip District rawn tlawhin Serchhip Kawlri tlang-a Cultural Heritage Centre sak mek a tlawh a, he hna hi kumin kumtir lamah zawhfel tura ruahman a ni.
Ministry of DoNER Secretary Chanchal Kumar hian Helicopter hmanga Serchhip rawn thlengin Helipad-ah Serchhip Bawrhsap Paul L. Khuma leh SP Gavit Gogna bakah sawrkar mi pawimawh ten an lo dawngsawng a, Serchhip a rawn thlen hnu hian Serchhip Bialtu MLA leh Chief Minister Lalduhoma hmalakna a Serchhip Kawlri tlang-a Cultural Heritage Centre sak mek chu a hmunah tlawhin he hna hi North Eastern Council (NEC) hnuaia sum hmuh atanga thawh a ni a. He hna thawhna atan hian cheng vbc. 4.31 ruahman niin September, 2024-ah tanin kumin kum tir lama zawh tura ruahman a ni a, PWD hnuaiah Excell Consultancy Services ten thawkin hna zaa 65 chu zawhfel a ni tawh tih thawktute chuan a sawi a ni.

DoNER Secretary hian helai hmunhma hi chipchiar taka fangin Contractor chu a rang thei ang an hnathawh zofel turin a hrilh a. Ministry atangin Funding-ah harsatna a awm loh thu sawiin, tangkai zawka hman a nih theih nan leh mipuite pawhin an hlut zual theih nan Trekking Route siam dan tur ruahman tel nise tiin rawtna a siam bawk.

Kawlri Tlang hi Zoluti laklet lehna hmun niin Serchhip Heritage Society chuan Mizo History vawn nunna tur te, zin mite hip nan leh a hmunhmaa khuanu thilsiam thing leh mau te vawnhimna ni pahfawmin he hmun hi chei a nih theih nan hun rei tak hma an lo la tawh a ni.

DoNER Secretary hi Planning & Prog-ramme Implementation Secretary Lalmalsawma Pachuau chuan rawn tawiawmin Serchhip District Bawrhsap leh sawrkar mi pawimawh dang ten an lo tawiawm a, Thenzawl tlawh bawkin nizan khan a riak nghal a ni.