Serchhip-ah Bawrhsap hovin NCORD thutkhawm neih a ni

Serchhip District NCORD chu nimin khan Serchhip DC Meeting Hall-ah thukhawmin NCORD thutkhawm hmasaa thurel bawhzuina te thlirletin, hmachhawp te sawiho a ni bawk.
District Level NCORD thutkhawm vawi 20-na leh kumin atana a vawi 10- na ah hian report hrang hrang ngaihthlak a ni a. Meeting hmasa leh tun tum Meeting inkarah ruihhlo (narcotics) kaihhnawhah Excise & Narcotics chuan mi 6 an man a; Heroin gram 260.87 leh Ganja gram 133.85 an man bawk a ni. Police Department leh Excise & Narcotics Department te hian School leh College hrang hrangah Drug awareness Campaign an nei bawk.

Hei bakah hian Standard Operating System (SOP) for Declaration of Drug Free Village ruahman chhin (draft) chu pharh niin sawihona hun an hmang a. He SOP in a tum ber chu- Drugs dona kawngah pawl hrang hrang te tha tichak tur leh sawt zawka ke an pen theih nan Drug Free Village siam tum a ni a. He SOP hi kenkawh a nih hunah chuan Mizorama khua leh veng zawng zawng ten an kalpui dawn a ni.