JJM hnuaia tuilakna enkawl zui dan tur sawiho a ni

Jal Jeevan Mission (JJM) hnuaia thingtlang khuaa tui lakte enkawl zui dan tur chungchanga ruahmanna siam dan tur sawihona chu niminpiah khan New Delhi-ah neih niin Mizoram atangin PHE Department Minister Prof. Lalnilawma pawh he hunah hian a tel a ni.

Ministry of Jal Shakti buatsaih he sawihona, ‘Minister-Level Policy Dialogue on Sustainable Operation & Maintenance of Rural Drinking Water Services’ hi Union Minister of Jal Shakti C.R Patil-a hona hnuaiah neih niin State tina PHED leh RD/LAD Minister-te an tel a. Jal Jeevan Mission (JJM) hi Central sawrkar programme niin kum 2019 atang khan Mizo-ram-a thingtlang khaw tinte tan Tui connection a thlawna pekna tur Scheme a ni a, tun dinhmunah hna hi zawh thawkhat tawh a ni. Kum 2019 atanga kum 2025 chhungin Solar Pumping Scheme 188, Gravity Scheme (Khawl tellova tui lak) 657 leh Electric Pump hmanga Tui Pump 7, avaiin 852 thawh zawh tawh a ni a, Mizoram thingtlang khua zawng zawngah hmalak a ni.

Niminpiah a thutkhawm ah hian PHE Minister Prof. Lalnilawma chuan Mizoram dinhmun tlangpui sawiin, Mizoram chu phai lam ang a nih loh thu te, kan tuilakna hnarte pawh khua atanga hla tak taka awm an nih hlawm thu leh chuvangin Operation and Maintenance (hnathawh leh enkawlzui) pawh khawtlangin an enkawl tur atan chuan a hautak bik thu te a sawi a, “Keini ang tlangram tan chuan chona lian tak a ni a, chutihrual chuan theihtawp kan lo chhuah ang,” tiin hetihrual hian India ram pum huapa JJM sum, Central sawrkar-a tang rei lutukte pawh release sak thuai turin a ngen nghal bawk a ni.

Minister hi RD&AD Commissioner & Secretary R. Zarzosanga; PHED Secretary Zodingpuii; PHED Engineer-in-Chief Er. Zodinthari bakah PHE leh RD&AD Official dang ten an tawiawm a ni.