KTP Inkhawmpui Lian pualin App tlangzarh a ni

Kristian Thalai Pawl (KTP) General Conference 2026 lo awm tur puala siam Mobile Application chu Inrinni (Jan. 17, 2026) khan Saitual Prebyterian Kohhran Centenary Hall-ah tlangzarh a ni a. App hi Siruk Consultancy in inkhawmpui puala an siam a ni.

He App-ah hian KTP General Conference mikhual thlenna tur Counter dinhmun hrang hrang dah a ni a, motor veivah dan tur kalhmang, inkhawmpui hun ruatna, thil bo leh chhar bakah lehkha kal chhuak te dah a ni a, heng bakah hian inkhawmpui thlengtu chanchin dah a ni bawk. KTP Inkhawmpui Organising Committee chuan a thlawna Mobile App siamsaktu Siruk Consultancy Firms chungah lawmthu an sawi a, thalaiten tangkai taka an hman theih nan duhsakna an hlan bawk.

Mizoram-a Kohhran lian ber Presbyterian Kohhran-a thalai inkhawmpui lian hi a vawi 65-na tur a ni a, February ni 26 atanga March ni 1 chhung khian Saitual Public Playground-ah neih  tur a ni a, hemi atan hian kawng hrang hrangah inbuatsaihna kalpui mek niin Pandal sak hna pawh ngawrh taka thawh mek a ni bawk.