Retailer-a ePoS leh Digital Weighing Scale thlunzawm

Sawrkar laipui thuchhuah angin Mizoram-ah pawh kumin January thla atang khan Retailer-a ePoS leh Digital Weighing Scale hmante chu thlunzawm a ni.

Mizoram sawrkar Food, Civil Supply & Consumers Affairs Department thuchhuah tarlan dan chuan, kum 2022 atang khan Retailer-a ePoS leh Digital Weighing Scale hmante chu sawrkar laipui a Ministry of Consumer Affairs, Food and Public Distribution, Department of Food & Public Distribution chuan thlunzawm (integrate) vek turin thu a lo chhuah tawh a. Mahse, he khawl pahnihte hi thlunzawm a nih chuan Internet that lohna leh awm lohna hmuna fingerprint hmet kher lova lak theih dan (Partial Offline Mode)-a Ration sem thin chu a theih tawh dawn loh avangin leh khatih hunlai khan Mizoram-ah internet that lohna leh awm lohna Retailer hmun 356 lai a la awm avang khan Mizoram chuan he khawl pahnih thlunzawm (integration) hi a kalpui ve ta rih lo a ni.

Tunhnaiah sawrkar laipui chuan thuchhuah siam thar lehin, he Integration hna hi a rang thei ang bera zo turin thu a pêk mai bakah, State Sawrkar hmalakna leh thlen chinte pawh report thehlut turin State Sawrkar zawng zawngte a hriattir avangin Mizoram-ah pawh internet awm miah lohna khua te pawh a lo awm tâk mang loh avangin kumin January atang khan integration hi kalpui ve a nih thu leh January, 2026 a Ration sem a lo khaihlak deuh anih pawhin mipuite leh retailer-te tawiawmna an ngen thu an tarlang bawk a ni.