Mipui in Pawan Hans Helicopter chhawr tangkai

Nikum (2025) chhung khan Mizoram hmun hrang hranga Helicopter Service, Pawan Hans Helicopter-ah passenger 7247 an awm a. Mizoram sawrkar-a Civil Aviation thawktute chuan Helicopter Service chu mipuiin an chhawr tangkai hle tih an sawi.

Civil Aviation-a thawktute sawi danin, nikum (2025) chhung khan January thla ah Helicopter passenger an tam ber a, mi 896 tlingin February-ah 840, March-ah 578, April-ah 518, May-ah 388, June-ah 469, July-ah 333, August-ah 363, September-ah 521, October-ah 733, November-ah 796 leh December-ah passenger 812 an awm a. Civil Aviation thawktute chuan Mizoram hmun hrang hranga service mek Pawan Hans Helicopter chu mipuiin an chhawr tangkai hle nia sawiin, tun dinhmunah Helicopter service pakhat a awm thu leh a dang service belh tir tumna a awm rih loh thu an sawi a. Thudawn danin, Helicopter hi passenger phurhna mai bakah Casualty evacuation (damlo serious) phurhna atan Life Saving Mission pawh tangkai taka hman a ni.

Mizoram sawrkar chuan mipuite chhawk zangkhai tur atan tangkai taka hman turin Pawan Hans Helicopter Ltd. nen inremsiamin, Mizoram-ah August ni 20, 2012 atangin Helicopter hi service tir a ni a. Hemi atan hian Ministry of Home Affairs (MHA) in dan a lo siam angin a senso (expenditure) 75% chu Ministry of Home Affairs (MHA) pek a ni a, 25% chu state sawrkar tum a ni. Mizoram-a Helicopter service mek atang hian kum khatah cheng vbc. 33 vel hmuh thin niin State sawrkarin kum khatah cheng vbc. 2.5 vel a seng ve thin a ni.