AMC Inthlan hun la chiang lo

State Election Commissioner Dr. H. Lalthangliana chuan Aizawl Municipal Corporation (AMC) inthlan hun tur a sawi chian theihloh tih sawiin, ruahman dan chuan kumin April emaw May thlaah emaw inthlan theih an beisei thu a sawi.

Nimin khan State Election Commissioner Dr. H. Lalthangliana hian a Pisa-ah Chanchinbu mite kawmin AMC inthlan neih tur chungchang hi a sawi a, February thla a Assembly Session neih tur chu Budget Session a ni tih sawiin, hemi bakah hian sawrkar kum kal lai tawp hun a hnai a, sawrkar hnathawk an buai vanglai a ni tih sawiin, tun dinhmuah sawrkar hnathawk te chu inthlan buaipui tura pawhpen an nih chuan nghawng a neih nat dawn avangin kumin March thla hma chuan AMC inthlan a remchang lo niin a sawi bawk.

State Election Commissioner chuan mipui leh political party lamin inthlan an cho tawh hle nia sawiin, thu lawmawm lam ni mah se Aizawl khawpui chauh ni lo Mizoram pum ngaihtuah a ngaih avangin sawrkar hnathawk buai vanglai taka inpawhpen chuan harsatna a thlen thei tih a sawi a, tun hma pawhin AMC chu a hun pangngai takah an la inthlang ngai lo tih a sawi bawk.

AMC term kal mek hi kumin March ni 1-ah a tawp tawh dawn a, Party ten an Candidate an puang chho tan mek a ni.