Serchhip-ah National Girl Child Day hman a ni

Ramchhung hmundangte rualin Zirtawpni kalta, January 23, 2026 khan ‘National Girl Child Day 2026’ chu Serchhip-ah pawh hman a ni a, hmeichhe naupang infiamna lama titha mi 4-te chawimawina hlan an ni.

Serchhip DC Pisapui Hall-a he hun hman hi Serchhip SDO (Sadar) Rebecca Laldinmawii Hrahsel chuan khuallian nia hmanpuiin National Girl Child Day chu kum 2008 atanga hman a nih thu leh he ni hi India rama hmeichhe naupang dinhmun hniam lutuk chawisanna atana sawrkar laipui ruahman a nih thu te, hmeichhe nau piang duhlohna tihtawp a nih theih nan leh hmeichhe naupang ten eng kawngah pawh an chanvo dik tak an hmuh theihna tura ruahman anih thu a sawi a. He ni an hman chhan ang taka hmeichhe naupang ten an chanvo dik tak an chan theih nana tha thawh a, a la hre ve lo te pawh hrilh hretu nih tum turin he huna tel te chu a chah bawk a ni.

District Hub for Empowerment of Women (DHEW), District Program Office, Women & Child Development, Serchhip District buatsaiha he hun hman ah hian Hmeichhe naupang infiamna kawnga titha mi pali (4) te hnenah 'Girls Champion Award' hlan a ni a. Chawimawina dawngtute hi Lalruat-feli (13) D/o Nicky Lalrinngheta, Chhiahtlang Kawn Veng (Badminton Player Trophy 20 chuang la tawh leh Under-13 Mizoram Ranking no.1 nilai te; Phoibi Malsawmtluangi Sailo (11) D/o Laleng-mawii, Venglai New Serchhip (State Level Boxing Tournament-a Serchhip District tana Gold Medal 4 leh 2023 Mizoram Kick Boxing Championship Gold Medalist, 2025-ah Mizoram tan State pawn-a Gold Medal 2 la tawh) te; Lalthakimi (14) D/o Zaliana, Thenzawl (All India Inter SAI Hockey Championship 2025, Bengaluru-a Gold Medalist) leh Lalvenpuii (14) D/o K.Lalrinzuala, Thenzawl (All India Inter SAI Hockey Championship 2025, Bengaluru Gold Medalist) te an ni. National Girl Child Day hi January 25-ah hman thin ni mah se kumin hian remchan zawkna avangin Zirtawpni khan hman a ni ta zawk a ni.