Republic Day lawmna kaihhnawih a thuthar thehdarhtute lungawi lohna chungchang sawiho

Aizawl-a Republic Day lawmna huna Mizoram Journalists’ Association (MJA) te lungawilohna chungchang chu nimin khan sawiho a ni.

Home Minister K.Sapdanga leh I&PR Minister B. Lalchhanzova te chuan nimin khan Home Minister Pisa-ah kum 2026 Republic Day lawmna inkhawm-a chanchinbumite lungawilohna te bawhzuiin Republic Day Organising Department zinga mawhphurhna pawimawh deuh latute Aizawl Deputy Commissioner Office, State Protocol Office leh Directorate of Information & Public Relations hotute an kawm a. He hunah hian IPRP&S Secretary Betsy Zothanpari Sailo, Aizawl Bawrhsap Er. Lalhriatpuia, State Protocol Officer Lalmuansanga Ralte, DIPR Joint Director pahnih Mina Zoliani Joute leh Malsawmsanga leh DIPR Deputy Director Andrew H. Lalremruata te an tel a. Home Minister K.Sapdanga chuan Republic Day lawmna inkhawm leh ‘Governor’s At Home’ chungchanga chanchinbumite’n lungawi lohna leh harsatna an nei chu pawi a tih thu sawiin, he thil thleng chungchanga ngaihtuah ngai leh ennawn ngaite sawiho a pawimawh avanga inkokhawm an nih thu a sawi a ni.

IPRP&S Minister B. Lalchhanzova chuan Chanchinbumite chu Sawrkar hunpui leh pawimawh ti phuisuitu leh tizahawmtu a nih thu sawiin, hetianga ruahmanna fumfe loh avanga harsatna an tawk chu pawi a tih thu a sawi a. Chanchinbumite lungawilohna an hriat rualin Official lam thu leh hla hriat a pawimawh tel tih sawiin, a inchotuah zawng ni lova a zaizap zawnga indawr tawn a pawimawh tih sawiin, that leh that inlawm tawn a, harsatna kan tawh kara hma kan sawn zawk theihna tur zawn thiam a pawimawh a, thil tha zawk a lo chhuah an beisei thu a sawi bawk.

He hunah hian Home Minister sawmna angin IPRP&S Secretary, Aizawl Bawrhsap, State Protocol Officer leh I&PR Officer te pawhin Official lam atanga sawitur an neih te an sawi a. IPRP&S Secretary Betsy Zothanpari Sailo chuan MJA lam hruaitute leh MJA member te nen pawh an inbiak tawh thu te, official lam atanga insiamthat ngai lai te pawh a awm thu te a sawi a. MJA te pawh sawrkarin an lungawilohna te a ngai thutak a, chutiang bawkin MJA lam te pawh mi puitling leh khawhawi zau an nih anga hmalam pana, ram tana theihtawp chhuah turin a chah bawk tih a sawi a ni.

Aizawl Bawrhsap Er. Lalhriatpuia pawhin chanchinbumite lungawi lohna lo thleng chu pawi a tih thu sawiin, anmahni lam pawh an inchhui let nasa a, an naute zinga inzilh ngai leh inhrilhfiah ngaite pawh hma an lak tawh thu a sawi a, a tul ang zela hma lak a nih tur thu leh tun hnuah chuan uluk leh fimkhur zawka hma an lak tawh tur thu a sawi a ni.