Tualthattu chhui chian phutin mipui pungkhawm

Justice For Marina Group chuan tunhnaia Tanhril nu, Marina Lalchhanchhuahi thihna rap-thlak takah thil felhlel a awm nia an hriat avangin nimin khan Aizawl-ah kawng an zawh.

Justice for Marina te hian Marina Lalchhanchhuahi tualthihna ah hian a mawhphurtu RL. Peka chauh a nih an rin loh avang leh inhnamhnawih dang an awm an rin avangin kawng an zawh a, nimin chawhma lam khan Aizawl Vaivakawn Police Station tual-ah pungkhawmin hemi hnu hian Vaivakawn atanga kawng zawh tanin Marina-i tualthihna avanga an lungawi lohna an aurualpui a. Hemi hnu hian Aizawl Chanmari lam chu pick-up Truck pali hmangin an pan leh a. Chanmari ah rei vaklo au rual lehin, Chanmari atang vek hian ke-a kawngzawh chhunzawmin Millennium Centre an pan a, Millennium Centre atang hian ke-a kawng zawh lehin Vanapa Hall Kawt-ah kawngzawh tihtawp nan hun an hmang a, he kawngzawhna khar a nih rual hian Aizawl SP hnenah Marina Lalchhanchhuahi tualthihna hriat belh an duh te chhuichhuah sak ngei tura ngenna lehkha an theh lut nghal a ni.