Lehkhabu Chhiar inelna-ah Mizoram in lawmman la

Mizoram Youth Commission (MYC) kaltlanga India rampum Lehkhabu Chhiar inelna (Reading Decathlon) a tel School pahnih - Mt Carmel, Chaltlang leh La Montessori, Mission Veng chu 2-na leh 3-na an ni.

Food4Thought Organisation leh Monocept te tangkawpin an buatsaih he inelna hi Quiz Round hrang hranga neih niin inelna hi Level thum-a kalpui a ni a, State Level-a inelna chu August 22, 2025 khan MYC in an hmunah alo buatsaih tawh a, School pali telin School tin atangin zirlai naupang pahnih zel an tel a ni. He inelna ah hian Mt. Carmel chu pakhatna niin La Motessori chu pahnihna an ni a, State Level Round-ah hian lehkhabu 50 chuang chhiar tur pek an ni a, hemi atang hian zawhna an chhang a ni.

Heng School pahnih te hi Regional Level inelna a tel tura thlan an ni a, November 29, 2025 khan Indore, Madhya Pradesh-ah Mizoram aiawhin an tel a. Regional Level hi Zone 5-a then a ni a, School 21 an tel a ni. Regional Level-ah hian Northeast Region-ah La Montessori hi pakhatna an ni a, Mt Carmel School hi pahnihna an ni thung a. Regional Winner te hian National Level-ah Northeast Region ai an awh a, lehkhabu 50 chuang hret chhiar tur an bituk a ni.

National Level-ah hian School 10 tlingin January 17, 2026 (Inrinni) khan Hyderabad-ah inelna neih a ni a. Mizoram aiawh te hi flight cancel avangin a hmun ah an tel theilo a, Organiser ten online a tel an phalsak angin, MYC Office atangin inelna ah hian an tel a. Zing dar 8:00 atanga tanin tlai 5:30-ah zawhfel a ni a. He inelna ah hian avaiin lehkhabu 100 chuang hret hmanga inel a ni a, Mizoram aiawih School Mt Carmel atanga tel pahnih- Krista Roluahpuia Khiangte (Class IX) leh Rebek Malsawmzuali (Class VIII) te chu pahnihna niin La Montessori atanga tel Malsawmhlui Pachuau (Class VIII) leh Joshua Lalawmpuia (Class VIII) te chuan pathumna dinhmun an hauh bawk a ni.

He Reading Decathlon hi kumtin buatsaih thin a ni dawn a, inelna neih a nih leh dawnah School tam zawk an tel theihna hriattirna zau zawkin MYC chuan a tichhuak zel thin dawn a. India rampum inelna- lehkhabu chhiar inelna hautak tak-a Mizoram aiawh School pahnih te hlawhtlinna chu an lawmpui thu sawiin, an thawhrimna leh inpekna ropui an tih thu an sawi a, hei hian Mizo thalaite ah nghawng tha a neih ngei a beisei thu an sawi bawk.