Serchhip District-ah Republic Day lawm a ni

India Republic Day vawi 77-na chu nimin khan Serchhip District-a SDO (Civil) thuthmun ah te pawh urhsun taka hman a ni.
Republic Day vawi 77-na hi Thenzawl-ah chuan SDO (Civil) Complex-ah zing dar 7:00-ah hman a ni a, SDO (Civil) K. Lalhlimpuia chuan India Hnam puanzar pawtpharin thuchah a sawi a, “Republic Day vawi 77-na lawmna ah hian kan chhinchiah tur pawimawh tak mai chu ‘Vawiin hi India Constitution hman tanna ni champha a ni’ tih leh ‘Indian Constitution chuan India mipuite hnenah anmahni rorel saktu tur duhthlan theihna leh mipui sawrkar siam a nih theih nan kawng a hawng’ tih hi a ni,” a ti a, sawrkar Department leh Office hrang hrang hmalakna tarlan a ni bawk. He hunah hian sawrkar Department hrang hrang a thawktute, khawtlang hruaitute bakah chanchinbumite an tel a ni.

North Vanlaiphai-ah pawh nimin India Republic Day lawmna hi neih a ni a, North Vanlaiphai Supply Tlang, Rahsi Veng-a Republic Day lawmna neih ah SDO (Civil) Dr. Peter Malsawmtluanga chuan India Hnam Puanzar pawtparhin India Hnam hla sak a ni a, SDO (Civil) chuan mipuite hnenah thuchah a sawi bakah sawrkar hmalakna hrang hrang a tarlang a, he hunah hian sawrkar Department hrang hranga thawktute an tel a ni.

Serchhip-a RD Block thuthmun, East Lungdar-ah pawh nimin zing khan Republic Day lawmna hi neih a ni a, East Lungdar Bazar Kawn a hun hman hi East Lungdar VCP, H. Hauhnunpuia chuan kaihruaiin Pastor Lalchhandamachuan hunserh a hmang a, East Lungdar BDO, Dr. Peter Malsawmtluanga chuan India Hnam puanzar pawtparhin India Hnam hla sak a ni a, mipuite hnenah thuchah sawiin khawtlang mi pawimawhte leh zirlaite an tel a ni.