Latest News

HARH THUTNA TUR NIA KA HRIAT TE

HARH THUTNA TUR NIA KA HRIAT TE

- Saia Khawlhring

Ramri a buaia emaw engemaw harsatna a rawn thleng a- mi thahnemngai ten "Aw Zoram Harh Rawh" te hi an rawn ti leh mai thin a. Harhna tur kha an rawn sawi leh silova. Riltam hnenah "Puar takin awm rawh" tih ngawta ei tur pek siloh ang deuh khan (Jakoba 2:16). Pathian ring turin kan inzilh chiama, a rin dan tur kan inhrilh leh silova, a hrethiam lo ten rilruin an ring veng veng fova, i piangthar tur a ni kan intia, a pianthar dan kha kan hrilh leh silova.

Chuvang chuan, kan ramri buaina avanga kan ramin harsatna kan tawh theih mek te thlir chungin, kan ram enkawltu kan hotute chunga lawm lohna thu pulung zet zeta Social Media Platform hmanga pho chhuak thinte, kan INTODELH tawk loh avanga ram hruaitu hmasa leh ni mekte dem rilru thintute, Vawiin-a HARH RAWH titute leh kei, he ngaihdan (he thuziak hi) neitupa nen lama kan HARH THUT THEIHNA thenkhat han pho ve reng reng teh ang. 

1. Inrenchem thu ah harh thut ang u :

Inrenchem hi Thawhchhuah belh tlukin a hlu. Nu/Pa ber i nih chuan in chhungkaw sum chevel endik nawn rawh. In tui hman dan, chawhmeh lei dan, chaw thing neih tam dan atanga Power in hman tam dan thlengin chhut nawn ila, a tlawm thei ang bera nun (Minimization of Cost of Living) tum teh ang u.

2. Thawkchhuaktu ngei nih tuma harh :

I/Ka thawhchhuah tam lam chu engzat pawh lo ni se, a awmsa ring raltu nilova, a thawkchhuaktu nih tuma HARH THUT a tul. Hrisel lohna leh harsatna dang nei chu kan sawi tel lovang a, mahse pianphunga rual ban, mi pangngai i niha, ka nih chuan a awmsa ringa, eiraltu (parasite) nih loh dan dapa vir chung chung a hun. I hna chu engpawh ni se, loneih, nitina inhlawh, zuarchhawng, tuition pe-a vakchhuak, delivery boy a tan, thenawm khawvengte mamawh lakkhawm sak, Bill pek sak, thingpui dawr a inhlawh, a enga pawh ni sek sek se, hlawh a tam emaw a tlem emaw, a awmsa eitu nih ai chuan a hlawk tho tho. Mizoram in a mamawh number one chu- THAWKCHHUAKTU a ni. Officer lian/Engineer lian, sawrkar sum awmsa ringa thawka, thawk hlawk vak silo, mipui chanai pawh hlawi thlak hreh vaklote aiin kum tina Buh phur 50 vel chauh tharchhuaktu LONEITUPA khan kan ramah thawhchhuah a ngah zawk. Ani chuan Buh hum Tin 2-3 atangin phur 50 a tipunga, a kum khat ei a tharchhuak tlat a, a chung zawka mi khi chuan a a awmsa a ei heuh heuh.

3. Thawhbelh leh hlek ang :

Zing nichhuah hnuah darkar engzatnge i la mut burh burh thin le. Dar 4:30 ah khua a var tawh a (tunlai) dar 8:00-ah i thawh si chuan khaw eng darkar engemawzat (daylight) chu i mu bo daih tihna. I mut bo hun chhung zawng kha kawmthlang huanah, chuktuah hnaiah huan siam nan, vawk vulh nan, tuition pek nan, Thekaa hna lak nan, etc a hman theih em?

4. Inkhawl tum ang :

Mahni ram, mahni chi puite zinga thlamuang taka cheng mihringte tan hian inkhawlkhawm hi a har hle a nih ka ring. Kan mikhualte (Vai & Khawchhak unaute) tan erawh chuan an mikhualna ram, an rilru ngheh tak tak theihlohna ram a nih avangin a mawlmang ber leh tlawm thei ang bera an nuna, inkhawl kha a harsa lo a niang. Mahse keini, mahni ramtiam (mahni ram dik tak) a chengte pawh hian inkhawl (saving) kan tum a ngai tlat. Kan lakluh tlem chuan kan khawl tlem deuh anga, kan lakluh tam chuan kan khawl tam deuh dawn a ni mai a, inkhawl ve hrim hrim kha a pawimawh lai chu a ni. (Fanghmir hi chaklo tak an ni a, nimahsela Thal-ah an chaw tur an khawlkhawm thin- Thuf. 30:25) Inrenchem leh inkhawlkhawm khi thil thuhmun a ni.

5. I hna ah i thawkrim em :

Mahni leh mahni inzawt ang le, Ka thawkrim em tih zawhna hi. Tunlaiah a tawngapawnga ‘Theihtawp ka/ kan chhuah’ tih tawngkam hman kan uar lutuk hi fuhlo riauvin ka hria. Theihtawp chhuah ka hriat ve hi chu miin a theihtawp chhuaha hna a thawh/tih kha a ni. Miin theihtawp a chhuah chuan a theihtawpin a thawk tur a ni a, chutianga thawk silova 'theihtawp ka/kan chhuah' a tih mai chuan Pathian hmaah dawt a sawi a ni. Ka hna hi ka thawkrim nge? hahdam deuhvin ka thawk tih kha inzawt theuh ila- “Aw, theihtawp chhuahin ka thawkrim” tia chhang ngam khawpin i HARH THUT TEH ANG U.

6. Pathian ring ila, beisei bawk ang :

Isaaka fapa Jacoba khan Pathian thlan, ro luahtu nih a duh lutukna lamah a Pa leh a U a bum a, chumi awmzia chu Pathian a ring lutuk a, a beisei takzet bawk tihna a ni a, chu rilru chu Pathian pawh khan a hriat sak a, a awmpuiin mal a sawm nasa bawk a. Chutiang rilru pu mi chu a pu Labana hnenah kum 20 a inhlawh a, a tiang nen maia Jordan ral kai chho kha kum 20 hnuah chuan hausak namenlovin a lo hausa ta a ni tih kan hmu a. Mahse Pathian malsawmna a dawn dan kha kan chhut pui a ngai. Ama tawngkam tawite hian a tifiah em em a ni. “Hetiangin ka awm thin, chhuna ni sa leh zana khawvawtin mi tihrehawm em em thin a, mut pawh ka hmu ngai tthin lova, ...Chung kum 20 chhung zawng chu i Inah ka awm a, i fanute hlawh turin kum 14 i rawng ka bawl a, i rante hlawh turin kum 6 ka bawl leh a, ka hlawh lah chu vawi 10 lai i tidanglam (Gen. 31:40-41)” tiin. A pu hnena kum 20 chhunga a hnathawh dan a sawi tawite khian Pathian malsawm tlakin a bei tih hi hai theih a ni lova, chutianga a tih chhan chu Pathian a rin bur vang leh a beisei tlat vang a ni.

Thlaler-a Israel fate an kal laia Manna a pek te kha an chhara an ei bawrh bawrh emaw kan ti ngawt thin ang tih a hlauhawm. “Manna chu Koriander (Dhania) mu ang, a lan danah chuan Tuikeplung ang hi a ni. Mite chuan an chhar khawm a, rawtsawmna ah an rawt sawma, sum ah te an denga, bel-ah an chhum a, chhangah te an siam a, ..Num 11:7”. Manna pawh kha van ata a thlawnin lo tlak tir mahse buh anga dena, chhum a la ngai. Pathian beiseia ringtute chuan engmah a thlawna dawn an tum tur a nilova, a thawhchhuah ngei chauh ringa nun a tum zawk tur a ni.

Sawi tur a tam ang, sawi belh ve tawh r'u...

Comments

Chhiar Hlawhte