Fall Armyworm avanga harsatna thlenna hmun Agriculture Minister in a tlawh

Agriculture Minister, C. Lalrinsanga chuan Fall Armyworm (FAW) in a tihchhiat mek Durtlang Leitan leh Sihphir-a Vaimim huan te chu nimin khan a tlawh.
He hunah hian Agriculture Minister chuan Fall Armyworm avanga loneituten harsatna an tawk chu pawi a tih thu leh a darh chak em avanga inven har tak anih thu a sawi a, Fall Armyworm hian Vaimim kher ni lo, thlai dang chi 80 lai chaw-ah a rin theih tlat avang hian Crop Selection, vaimim thlakna tur thlan kawngah pawh a ti buaithlak hle tih a sawi a. He rannung hi inthlahpung chak tak anih avangin ram anga kan \anrual a hma kan lak tlan a ngai tih a sawi bawk.
He hunah hian Agriculture (CH) Director, Rohmingthanga Colney chuan Fall Armyworm tihremna kawnga Agriculture Department in hma an lak dan hrang hrangte a sawi a. May ni 15, 2019 hian Indian Institute of Maize Research, National Centre for Integrated Pest Management leh ICAR-National Bureau of Agricultural Insect Resources a\anga mithiam ten Mizoram an rawn tlawh tur thu a tarlang a. May 6, 2019 thlenga Fall Armyworm in Mizoram hmun hrang hranga Vaimim hmun a tihchhiat chu Hactare 2189-a zau a nih thu leh chhungkaw 5636 a nghawng tawh thu a sawi bawk.
Fall Armyworm (Spodoptera frugiperda) hi rannung thlai hmelma zingah chuana a \ihbaiawm pawl tak a ni a. He rannung hian Vaimim bakah thlai dang tam tak sawmriat (80) ngawt a khawih chhe \hin a, chung zinga langsar zualte chu, Buh, Faisa, Fu, Buhtun, Dal, La, Zikhlum, Tomato leh a dangte an ni. A \obul hi Tropical leh Sub-Tropical America ram niin, kum 2016 khan West Africa ramah pemlutin nasa takin Vaimim leh thlai dangte a suat a. India ramah hian June, 2018 khan Karnataka-ah a rawn thleng tih hriatchhuah a ni a, thla kaw (9) chhung lekin state sawm (10)-ah a darh hman a. Hriat theih chinah Vaimim hmun hectare 1,70,000 laia zau a ti chhe tawha hriat a ni.
Fall Armyworm (FAW) Pangang hian thlai a ti chhe ber a. A pui, Pangang thlahtu hi Lungphurthlahtu (moth) kan tih mai, zan lama chetla chi a ni a, ram hla tak takah pawh pem thei niin zankhat lekah KM 100 lai a hla a thlawk thei a ni. A pui hian thlai-ah a khawm deuhin a tui (50-200) a dah a, a pui damchhung ni 10-21 chhung hian 1000-1500 lai a tui thei a. A tui hi ni 2-3 hnuah keuin, a pangang keu thar hi a hring a, an lu hi a uk emaw, a dum emaw niin, a lo len deuhah bawngek hring rawng a lo ni \hin, a taksa pang sirah a dung zawngin a dumin a rang a, a mawng lamah spot (val) pali (4), kil li nei-a intlar a awm a, a lu-ah Y-letling zawng a inthai a awm bawk a ni.

Comments

Chhiar Hlawhte

Youth Icon Top-50 thlang

PAN CARD an tih teh fo hi - Laldinpuia