Mizoram-a eiruk thubuai ah IAS Officer thiamloh chantirin kum 3 tang tura tih a ni

District Council & Minority Affairs leh Horticulture Secretary nilai, Rodney Lalrinawma Ralte IAS chu eiruk thubuaiah Court of Special Judge (Prevention of Corruption Act) Special Judge, Thang Lianmang Guite Court-in thiamloh a chantir a, kum 3 chhung hrehawm taka lung In tang tur leh cheng nuai 5 chawi turin a hrem.
He thubuai-a Sawrkar aiawha ding Public Prosecutor, R. Lalremruata sawi danin, Rodney Lalrinawma Ralte hian Mamit Bawrhsap a nih lai kum 2010 bawr chhoah khan Dampa Tiger Reserve-in a huamchhunga Andermanik khaw sawnchhuah nan National Tiger Conservation Authority a\angin cheng nuai 2,770 dawn a ni a. He sum hi diklo taka hman nia sawi a nih avangin khatih laia Chief Secretary chuan Vigilance Department hnenah he thil hi chhui turin a ti a, hemi ang hian Anti Corruption Bureau (ACB) chuan he sum chingpen nia sawi hi a chhui chiang ta a ni.
ACB-in an chhuina a\anga a lan danin, he sum hman a nih danah hian thil fel tawklo a awm ngei nia hriat a ni a, Andermanik khaw sawnna atana sum hmanna bakah Dampa Tiger Reserved huamchhunga khaw awmte sawn dan tur leh an khawtlang tana hmalak dan tur ngaihtuah a nihnaa khawtlang hruaitute Sitting Allowance pek an ni ngai lo nia hriat a ni a. Hei bakah hian zun In leh hmasawnna hna hrang hrang thawhna ah pawh khawtlangin an dawn tur zat pe kim lovin khawtlang hruaitute chu lehkha ruakah an sum dawnna hming ziah tir an ni a, hetah hian thuneitute chuan sum tam tak an hlep ru ngei nia hriat a ni bawk a. Heng puh a nihna hrang hrangah hian thubuai ngaihtuahtu Court of Special Judge (Prevention of Corruption Act) Special Judge, Thang Lianmang Guite Court chuan ACB-in a thil chhuina Report a thehluh leh thuhretute thusawi a ngaihthlak a\angin Rodney Lalrinawma Ralte chu thiamloh a chantir a, hrehawm taka kum 3 chhung tang tur leh cheng nuai 5 chawi turin a ti a. A pawisa chawi tur hi a pe theilo a nih chuan kum 1 dang a tan belh a ngai dawn a ni.
Hetihrual hian Court chuan Rodney Lalrinawma Ralte chu a laka Court thurem danah a lungawilo a nih chuan Court sang zawka a zualko theih thu a sawi a. High Court-a a zualko theih nan thla khat (1) chhung hun pein, hetih chhung hian Rodney Lalrinawma Ralte chu Bail-a chhuah lailawk a remtih sak a. Thla khat chhunga High Court-a a zualkona lehkha te Court-a a thehlut hman lo a nih erawh chuan man leh nghal a ni dawn a ni.

Comments

Popular posts from this blog

PAN CARD an tih teh fo hi - Laldinpuia