MR Teacher 946 lak thar turah sawrkar chu dan ang thlapin a kal dawn - Edn. Minister

School Education Minister, Lalchhandama chuan MR Teacher 946 lak thar turah sawrkar chu dan ang thlapa a kal tur thu a sawi.

Nimin a Aizawl Mizo Hnam Run-a MNF Inkhawm-a thu a sawina ah School Education Minister, Lalchhandama Ralte chuan MR Teacher 946 lak thar tur chungchang hi sawiin, he hna lak turah hian sawrkar chu dan ang thlapa a kal tur thu hi sawiin, “Party mi leh kan laka pangchang te pawh ka hrilh duh chu MR Teacher lak turah hian dan ang thlapin kan kal dawn tih hi a ni. 'Pathian leh kan ram tan' titu kan ni a, entawntlakin tih kan tum,” a ti a. Party \henkhatin \hahnem an ngaihpuina ah lawmthu sawiin, “An thusawiah mipui kaihhruai dikloh tumna a awm em aw, a tih theih thung. He hna lak turah hian dan pawngsual kan nei lo, tih hi ka sawichiang duh a ni,” a ti a. India ram zirna kalphung ah train lovin zirtirna a pek theih tawh loh tih an hriat thu pawh sawiin, “Zirtirtu nghet la turin MTET neih a ngai tih kan hria a, tun \umah hian MR Skill-II Trained Teacher kan la dawn a ni. 'Reilote ah an party mi an dahnghet dawn,' min ti a. Kan zirtirtu lak turah hian, 'a khaw mi train an ni tur a ni,' kan ti mai a, ZPM, Congress, MNF kan sawi lo. Tin, zirtirtu kan dahnghet chho dawn a nih pawhin MTET lo kan dahnghet dawn lo, tih hi mipuiin lo hria se kan duh,” a ti bawk.

Education Minister chuan tun \um hnalak turah hian Aizawl khawpuiah chauh hnalak a ni dawn lo tih pawh sawiin, “Zirtirtu hna diltu in an thawh duhna District \heuhah dilna an siam ang a, District tinah hna kan la dawn. Zirtirtu \henkhat reilote an zawm hnua Aizawl luh kherh leh \hin ang kha tihbo kan duh a, an thawh duhna District-ah hna an dil a ngai dawn. Thingtlang lam zirna tlabal em em siam\hat hi tun \um zirtirtu lak thar turah hian kan target a ni,” a ti bawk.

Mi \henkhatin 'Zirtirtu kan ngah semrual rawh se, \ul lova hnalak tumna a ni' tia lo sawi an awm a hriat thu pawh sawiin School Education Minister chuan, “Mizoram hi khawte tak te te a inbawk hrang kan ni a, phai ram anga Teachers People Ratio anga chhut chi a ni lo. Hetianga ngaitute hian Zirtirtu pakhatin pawl tin an kawp leh hi an duh em ni? Subject thiam bik neiin an subject thiam bik mil zela naupangte zirna an pek pawh kan duh a. Tuna kan lak thar turte nen hian Class tin daih zirtirtu pek kan tum chauh zawk a la ni. Heti chung hian kan la insum a, Class daih ngawr ngawr, a spare tur kan chhut tel lo zawk a ni,” a ti bawk a. IV Grade mi 54 lak thar turah dilna form la mi sangli chuang an awm tawh thu pawh sawiin, “IV Grade lak turah hian chumi khaw tan, tih a awm lo. 'Kan veng-ah a ruak a tia dil chi a ni lova, Eduction Department-in IV Grade hna 54 a la dawn a ni tawp mai,” a ti bawk.