Bru laklet tawpna ber tur atana hmalak dan tur chungchang sawihona Kolasib-ah neih a ni

Tripura a Bru raltlan te laklet hna thawh hnuhnung ber tura ngaih atana hmalak dan tur ngaihtuahin nimin khan Kolasib-ah District Level Consultative Committee chu District Bawrhsap, Zoengsanga hovin an \hukhawm.
Kolasib DC Conference Hall-a he \hutkhawm ah hian Mizoram Sawrkar-a Home Department Addl. Secretary, Lalbiakzami chuan nikuma Sawrkar in All NGO te hnena a lo intiam angin tun \uma Bru laklet tum hi a tawpna tur a ni tih a tarlang a, hemi atan hian tun \uma list an neih te chu kum 2018 ami anih thu leh List hi ennawn leh tura ruahman niin 2nd Phase Identification chu neih leh phawt a ngai dawn tih a sawi a. Bru laklet tur te chu inkaihhruaina (guideline) bu in a phut angin an chhuahsan Assembly Constituency-ah ngei dahlet tur an ni a, hemi kawnga hma latu tur Official te chu fimkhur leh uluk taka mahni hna hlenchhuak turin a chah bawk.
He hunah hian Kolasib District-a Bru ho letna tur khua a VCP te chuan an harsatna tawh dan hrang hrangte report an pe a, kawng awlsam zawk leh felfai zawk tura an ngaih chungchangah te pawh rawtna thlenin, Bru dahna tur khaw sawm (10) zinga khaw panga (5)- Bukvannei, Meidum, Pangbalkawn, North Thinglian leh Saihapui (K) a Bru ho awmna tur hmun chuan Forest Plantation a khawih buai dawn avangin thuneitu sang zawk hnena thlen a ngaih thu tarlan a ni a, Rastali khua a chhungkaw 79 dahna tur hmun ruahman chu mimal ram anga chhal an nih hlawm avangin endik \hat leh vek a ngaih tur thu tarlan a ni bawk.
Kolasib District-a Bru laklet tur te hi khaw sawm (10) a dah tur an ni a, Dilzau-ah chhungkaw 55, Saihapui (K)-ah chhungkaw 57, N. Thinglian-ah chhungkaw 157, Hortoki-ah chhungkaw 131, Pangbalkawn-ah chhungkaw 45, Bairabi (Zophai)-ah chhungkaw 54, Bukvannei-ah chhungkaw 45, Meidum-ah chhungkaw 45, South Chhimluang-ah chhungkaw 154 leh Zodin (Rastali)-ah chhungkaw 79 niin, Kolasib District-a Bru chhungkaw laklet tur hi an vaiin chhungkaw 822 an ni a. Tun dinhmunah nikum a Khakchangpara leh Hamsapara Camp a\anga laklet chhungkaw pahnih-Lalnunfela te chhungkua leh Hriata te chhungkua chu Meidum leh Rastali khua ah an cheng mek a ni.
Mizoram Sawrkar-a Home Department OSD, David H. Lalthangliana chuan Bru laklet chungchangah hian Sawrkar chu amah maiin a che thei dawn lova, VCP te bakah khawtlang hruaitute leh mipui \anpuina an mamawh dawn tih sawiin, khawtlang hruaitute chu thawhpui ah a sawm a, hmalakna tur kawng hrang hrang ah harsatna an nei emaw, thu zawhfiah duh leh hriatchian duh an neih chuan Home Department thuneitu te chu an inhawng reng tih a sawi bawk.

Comments

Popular posts from this blog

PAN CARD an tih teh fo hi - Laldinpuia