Serchhip-ah inkhel ropui a awm dawn

Naktuk May 24, 2019 hian Mizo Footballer \ha ber ber te inkhel chu Serchhip-ah en theih a ni dawn a, Serchhip District-a Footballer \ha ber berte nen an inhmachhawn dawn a ni.

Eng inkhel nge ? Khawiah nge? :

He inkhel hi a awlsam zawngin Mizote zinga eizawnna atana Football khel, Mizo Professional Footballer Association te leh Serchhip District Football Association (SDFA) hnuaia Footballer \ha ber ber te inkhelh a ni ber a, naktuk May 24, 2019 (Zirtawpni) dar 1:30 hian Serchhip Sports Complex-ah khelh tur niin inkhelh kar ah zaithiam zai te pawh ngaihthlak tur a awm dawn a ni.

Mizo Professional Footballer Association :

Mizoram a\anga Footballer \ha, State chhung leh pawna eizawnna atana hmang hian Mizo Professional Footballer Association hi dinin hmun \henkhat ah chuan Exhibition Match hi khelh a lo ni tawh a, hetianga Programme an buatsaih kal zelah hian he inkhel pawh hi neih tur niin tun \umah hian India players langsar ni chho mek leh Serchhip tlangval, Daniel Lalhlimpuia pawh inlan tura beisei a ni a. Delhi Dynamo FC tana khel mek Serchhip Field Veng tlangval, Daniel-a hi Serchhip mi leh sa ni mah se naupan laia Academy-a awm leh chuta \anga Club lian zawm nghal a nih avangin Serchhip khua ngei pawh hian a khel kan la hmu tam lo hle a, tun \umah hian Serchhip Sports Complex-ah a rawn inlan dawn a, Serchhip mipui tan chuan en loh phal chi a ni lo ang.

Ani bakah hian Football-a Mizote min phochhuaktu tih ngam, Malsawmtluanga Shylo (Mama) pawh he hunah hian rawn inlan tura beisei niin India Team-a regular taka khel mek leh goal khung thei, Jeje Lalpekhlua pawh Mizo Professional Footballer Association aiawh hian rawn inlan tura beisei a ni a, anni bakah hian Zohmingliana Ralte (Chennai FC), Lalruatthara (Kerala Blaster FC), Robert Lalthlamuana (North East FC), Jerry Lalrinzuala (Chennai FC) leh Lalrindika Ralte (East Bengal) te chu players langsar zual zingah hian an tel a ni.

Serchhip-XI lam te thung :

Heng kan Mizo Footballer chhuanvawr te lo hmachhawn tur hian Serchhip-XI Team pawh thlanfel ni tawhin Manager atan Lalrem-ruata Ralte leh Asst. Manager atan Zoramthara (Sena) te kaihhruaina hnuaiah Team din a ni a, Coach atan PC. Vanlalvuana niin an Team ah hian SDFA hnuaia khel mek players \ha te chu an kim hle tura ngaih a ni a. Tunhnaia Serchhip-a Football Club hlawhtling bera chhal ngam, New Serchhip FC a\angin R. Lalremruata (Arapa) chu players langsar tura rin nghal niin ani hi MPL ah pawh players langsar ni thei a ni a, ani bakah hian ISL leh I-League a sulhnu lo hnutchhiah nual tawh tuna Aizawl FC player, Lalrinfela hi team innghahna tham a ni bawk ang. Anni bakah hian P&E Veng tlangval, Mark Zothanpuia leh Field Veng tlangval, Eric Remruatpuia te pawh hi ngaihven hlawh tur zingah an tel awm e.

En man a awm dawn :

He inkhel en turte tan hian En man siam a ni dawn a, Ticket pakhat Rs. 50/- zel ni tura ruahman niin Ticket hi 1500 vel chauh siam a ni dawn a, tin, zirlaite pawh he inkhel en tur hian sawm an ni dawn a, School naupang Uniform ha te tan chuan en man hi mi pakhat tan Rs. 10/- a ni dawn thung a ni.

Hetianga Players langsar te inkhel hi Serchhip-ah en tur a awm khat mai ni lovin, ala awm ngailo niin a lang a, chuvangin Serchhip-a ‘Football ngainatu’ inti te tan chuan he inkhel hi en loh phal chi niin a lang lo.