Naupang \hazual 10 te Badminton zirna tur Serchhip-ah District Bawrhsap in a hawng

Mizoram sawrkar, TATA Trust, Pullela Gopichand Badminton Academy leh Mizoram Badminton Association te \angkawp buatsaih Badminton zirna tur, Regional Development Centre chu Inrinni khan Serchhip District Bawrhsap, Sangchhin Chinzah chuan Serchhip-ah a hawng.

Serchhip Tarpi tlang, SIRD Auditorium-a Regional Development Centre hawnna hunah hian Serchhip District Bawrhsap, Sangchhin Chinzah chuan TATA Trust (NEIDA) hmalakna hnuaia he hmalakna ah Aizawl pawnlama hmalakna hmasa atan Serchhip thlan kan ni chu lawmawm a tih thu leh Serchhip mipui ten kan vanneih zia hriaa lawm nachang kan hriat a \ul thu a sawi a. TATA Trust hian NEIDA kaltlangin Mizoram-ah kawng hrang hranga hma an lak thu sawiin, kan nitin khawsak chawikanna tura ranvulh leh thlai chin bakah infiamna lama hma an lakna te chu lawmawm a tih thu a sawi a. Regional Development Centre (RDC) Serchhip-a Badminton zir tur naupangte chu tih takzeta zira hlawhtling ngei tura a duhsak thu leh nu leh pa te pawhin an fate taimakna leh tih tak takna tello chuan hlawhtlinna a awmlo tih hriaa theihtawp chhuah pui turin a chah bawk.

Regional Development Centre, Serchhip hawnna hun hi Serchhip District Badminton Association President, John Zorammawia chuan kaihruaiin TATA Trust-a East & North East India-a Zonal Head, Vijay Yagnamurthy chuan he hmalakna an kalpui dan tlangpui sawiin, RDC-a kal tur naupangte chu an vanneih zia hriaa theihtawp chhuah turin a chah a, nu leh pa te pawhin an fate theihtawp chhuah pui turin a chah bawk. 

NEIDA State Programme Coordinator, B. Lalrinkima chuan he hunah hian Serchhip District-a NEIDA hmalakna leh RDC kalpui a nih dan turte sawiin, kum 2016 a\anga hma an lak thu leh thawktu 6 an awm mek thu a sawi a, RDC Project chu kalpui zel tura ruahman a nih thu leh National leh International Level pawha Coach \ha pek an tum thu a sawi bawk. Mizoram Badminton Association (MBA) Executive Member, Lal\anpuia pawhin tuna hmalakna hnuaiah hian Mizoram ah Grassroot Academy 40 awmin thlatin cheng nuai 4 vel sen a nih thu a sawi bawk.

Mizoram sawrkar, TATA Trust, Pullela Gopichand Badminton Academy leh Mizoram Badminton Association te thawkho chuan nikum a\ang khan Mizoram-ah Badminton Coaching chu mumal takin an kalpui a, he Coaching hi Level thum-ah \hen niin Grassroot Centre, Regional Development Centre leh Centre of Excellence-ah te \hen a ni a. Tunah hian Mizoram hmun hrang hrangah Grassroot hi 50 chuang hawn ni tawhin heta ti\hate Professional player ni tura chherna atan Regional Development Centre (RDC) chu hmun 6-ah hawn tur a ni a, tunah hian Aizawl-ah leh Serchhip ah te hawn tura tih niin Aizawl-a hawn a nih hnuah Serchhip-ah hawn leh a ni a. Regional Development Centre a\anga a \ha fal bik thlanchhuah te chu International/Top Class player ni turin Centre of Excellence-ah enkawl leh an ni dawn a, Centre of Excellence hi tunah hian cheng vbc. 20 sengin Sihphir-ah buatsaih mek a ni bawk a.

Tunah hian Serchhip-a Grassroot kalpui mekah hian Coach 2 hnuaiah naupang 60 awmin Regional Development Centre-ah hian naupang 10 an awm thei dawn a ni.